نۆشدارێ مەزن
نارین حەمید سەبیح
دناڤ دۆرپێچا بایێ زڤستانێ د بەرتەنگییا ترومبێلێدا، چق چقا تزبی یێن وێ و پست پستا لاڤایێن وێ یێن بەردەوام، چاڤ ل ڕێیا گەهشتنا جهێ مەرەم پێ، ژبیرا وێ بر کو ئەو کوژییێ لێ ب ئارامی ڕوینشتی یێ قورتالکەر بوو، دەنگێ بهیڤیبوونێ مزگینییا دلخوەشکەر گەهاندنە گوهێن وێ لدەمێ دگۆتی:
– دبێژن ئەڤ نۆژدارە ژ هەمییان پتر باوەرپێکرییە، بتنێ دیتنا وی و گوهلێبوونا ئاوازێن دەنگێ وی جۆرە چارەسەریەکە، ئەرێ ئەڤە ئێکەم سەرەدانا تەیە؟
– بەلێ ئێکەم سەرەدانە .
کورتبڕییا بەرسڤا وێ نیشانا ماندیبوونا ڕێکا دڕێژ خویا دکر، دەنگێ بێگونەهییێ خوە ڤەددزی نێزیک گوهێن وێ دایکا دلۆڤان و گۆتێ:
– تو دێ باشبی دادێ، ئەڤا شوفێری گۆتی دێ هۆسابیت مادەم وی سەرەدانا نۆژداری کرییە لبەری نوکە.
شوفێری چ دەمەکی ژی نۆژدار نەدیتبوو، بەلێ بو ڕازیکرنا دلێ وێ ئەو ئاخفتنە كر.
ئەڤە نیڤ دەمژمێرە خاتین نێرگز دگەل کوڕێ خوە یێ زارۆک چاڤەرێیا دۆرا خوەیە، دا نەخوەشییا خوە بۆ نۆژداری دیاربکەت.
– نێرگز خان، فەرموو.
پشتی ناڤێ خوە گوهلێبووی، نێرگزێ هەمی وەستیانا ڕێکێ ژبیرکر؛ ژبەر وێ خوەشیا گەهشتییێ.
پشتی کو بدێمەکێ تژی گڕنژین نۆژداری بخێرهاتنا وان کری و ئاریشەیا نێرگزێ دیاربووی و نێزیکی چوار پێنج دەرمانان بۆ نڤیسین، لدەرازینکا دەرکەفتنا نێرگزێ ژ کلینیکێ، وێ هەست ب ڤالاهییەکا قەبارە گران کر و هەست پێکر رەوشا وێ وەکی یا بەری نوکە لێهات، ئەڤێ ڕویدانێ گۆتنەکا مەزنان لبیرا وێ ئینا لدەمێ دگۆتین «ئەم چووین ب کار و کۆک، لێ ئەم زڤڕین سەر شەمامۆک» و بخەمگینیڤە بەرەڤ مال دا ڕێ.
خاتین نێرگز کچەکا موسلمانە، بەلێ ئەڤە بۆ ماوەیێ چەندین هەیڤە کەمتەرخەمییێ دنڤێژێن خوەدا دکەت. دەنگێ بانگێ عەیشا ئەو ژ وێ خەوا پشتی سەرەدانا نۆژداری هشیارکر بێی کو هەست پێ بکەت هەر بهەمان دلتەنگی خوە بۆ نڤێژێ بەرهەڤکر و جهنڤێژکێ خوە ل عەردی ڕازاند، پشتی بدوماهیکهینانا نڤێژێ و کرنا زکرێن پشتی وێ، تەزینکەکا وەکی وێ ئاڤا ب مرۆڤێ بێهوشدا دکەڤیت و وی هشیاردکەت بسەر گیانێ وێدا هات و ئەو ڤالاهییا قەبارە گران بوو ڤالاهییەکا ڤالا ژ گرانییێ، ب هەردو چاڤێن تژی ڕوندکڤە ئەوێ سوپاسییا خودایێ خوە کر ودانپێدان کر کو ژبلی وی چ نۆژدارێن خودان شیان و مەزن نینن.
