نیاسین
زوهێر كۆرەماركی
ڤی زەمانی گەلەكا بزەحمەتە مرۆڤ بكاریت هەڤالەكێ باش هەلبژێریت كو هەڤالێ هەڤال بیت، دوور بیت بەرژەوەندا هەڤالێ نوكە باراپتر هەڤالێن كاتی و بەرژەوەندانە لسەر بنیاتێ هندێ دئێنە هەلبژارتن، چونكی هەڤالێن دی هەكە نەبێژین نینن، لێ گەلەك دكێمن، هوسا دیارە دڤی زەمانی بەرژەوندو سامان یێن بووینە پیڤەر،هەڤال لسەر ڤی بنیاتی پەیدادبن، ئەو پیڤەر و میكانزمێن بەرێ نەماینە كو تۆ هەڤالێ ب هەموو واتا هەلبژێری كو یێ راستگۆ و دلسۆز و خودان ئەتەكێتێن ژیانێ بیت و یێ وەفادارو ئەمانەتدار بیت.
دووپات دكەین كو دڤی زەمانی دا هەلبژاردنا هەڤالێ پڕی سیفەتێن جوان و پاقژ و خودان پەیڤ و ئەمانەت و راستگۆ گەلەكا ب زەحمەتە،لەمانێ پرسیارەك ژ زانایەكی هاتەكرن گۆتێ: ئەم خەلكی چەوا بنیاسین و چەوا بكەینە هەڤال و دوستێن خوە.
ئەوی د بەرسڤاخۆدا وەها گۆت :
دێ خزم و كەس و كارێن خوە هوسا دنیاسی دەمێ تۆ ژماڵ دوور دكەڤی و زاروك و مالاتە بتنێ دمینن، زارۆكا ژی دێ هوسا نیاسی دەمێ دایك و بابێن وی بناڤسالڤە دچن پیر دبن. دێ هاوسەرێ ژی هوسا نیاسی دەمێ زەلامێ وێ یێ هەژار و نەدارو دەست كورت بیت و نەشێت ژیانەكا باش بۆ دابین بكەت، هەر هوسا مێر ژی وەختێ ژنكا وی نەخۆش دبیت و تۆشی ئێشەكا گران یان دۆمدرێژ دبیت، كادێ چەند لسەر خوە بیت و چاڤدێریا خێزانا خوە كەت، دێ برایێ خۆ ژی هینگێ نیاسی وەختێ دابەشكرنا میراتێ بابی، هینگێ دێ جەوهەرێ برایێ تە دیار بیت و دێ برایێ خوە باش نیاسی، بەلێ هەڤال و دۆست هینگێ دیار دبن وەختێ تۆ دكەڤیە تەنگاڤییەكێ دا، دێ زانی كا تە هەڤال و دۆست هەنە یان نە؟
لەورا گەلەكا گرنگە مرۆڤ یێ باش بیت دا ل باشا بگەریت نە مەعقولە ئەز هەڤالەكێ خراب بم و ل هەڤالەكێ باش بگەرم، كەنگی ئەم هەموو دێ ل خوە زڤڕین و داب و نەریتێن بەرێ یێن جوان دێ دناخێ خوەدا هەلگرین و كار پێ بكەین ولسەر برێڤە بچین، داكو تاما ژیانا جاران ژ ژیانا نوكە بهێت، ئەم هوسا دبینین ژیانا نوكە گەلەكا بێ تامە،چونكی گەلەك بهایێن مرۆڤایەتیێ یێ ژدەست داین.
