نیفاقا سیاسی و نه‌ته‌وه‌یی..
شڤان سالم گولى
ئه‌گه‌ر بێژم سیاسه‌تكرن لێگه‌ڕیانه ل گونجاندنا به‌رژوه‌ندیێن هێزان یان حوكمه‌تان یان وه‌لاتان د وارێن ئابووری، نه‌ته‌وه‌یی، ئه‌منی…هتد. باوه‌ر ناكم من تشته‌ك شاش گۆتبیت و ته‌خمین دكم زۆر كه‌س هه‌ڤڕا بن ژی ل سه‌ر ڤێ چه‌ندی. ل سه‌ر ڤی بنه‌مایى دبیت هنه‌ك جاران فند و فێل ژی د سیاسه‌تێ دا هه‌بن، لێ ب هیچ ئاوایه‌كێ نابیت ئه‌ڤ فنده و فێله ل سه‌ر حسابا ئه‌وا دبێژنێ ئاساییشا نیشتمانی و ئاسووده‌بوونا وه‌لاتیان بن.
دیاره بابه‌تێ ئالۆزیێن د ناڤبه‌را حوكمه‌تا هه‌رێمێ و چه‌كدارێن په‌كه‌كێ دا كو مه زۆر جار ئاماژه پێدایه ژ لایێ هنه‌ك هێز و ئالیێن پشكدار ونه پشكدار د حوكمه‌تا هه‌رێمێ دا و زۆره‌ك ژ بناڤ چالاكڤانان ژی دهێت ته‌نه‌گكرن بۆ شه‌ڕ یان ئالۆزیێن د ناڤبه‌را پارتی و په‌كه‌كێ دا، كو جارێ خۆزی ئه‌و ئالۆزیه د ناڤبه‌را پارتی وه‌ك حزب و په‌كه‌كێ ب تنێ دا بایه، چونكی دبیت قه‌باره و زیانێن وێ هنه‌ك بچووكتر بانه، لێ ب هیچ شێوه‌كێ وه‌سا نینه، به‌لكو ئه‌وا هه‌یی د ناڤبه‌را هه‌رێما كوردستانێ و په‌كه‌كێ دایه، كو كورتكرنا وێ د ناڤبه‌را پارتی و په‌كه‌كێ دا ژ بلی مه‌زنكرنا پارتی تشته‌كێ دی نینه.
یا جهێ سه‌رنجێ یه زۆره‌ك ژ ڤان ب ناڤ چالاكڤانان و پارتێن سیاسی زوو ب زوو بانگه‌وزان بۆ شه‌رێ براكوژیێ به‌رز دكن، بگره ل سه‌ر شه‌هید كه‌تنا چه‌ندین كادرێن پارتی ژی را هه‌ر پارتی ب ڤی شه‌ڕی تۆمه‌تبار دكن، كو هه‌تا ڤێرێ كێشه نینه، چونكی مه‌به‌ستێن وان دیار و رۆنن،
لێ حێبه‌تی بوون د وێ دایه هه‌مان ئه‌و چالاكڤان و هێزێن سیاسی یێن ل بۆیه‌رێن 16 ئۆكتۆبه‌رێ ئاراسته و هاندانا هێزێن ئیراقێ و حه‌شدار شه‌عبی و سۆپایێ قودسێ ئیرانێ دكرن كو به‌رده‌وام بن ل سه‌ر هێرشێن خوه هه‌ر چی كورده‌كێ پارتی هه‌یه ب خوینێ تێكه‌لی ئاخێ بكن،گه‌لۆ ب راستی ژی كه‌س هه‌یه ژ وان ئالیان رۆهن بكت ئه‌رێ ئه‌و هاندان و رێخۆشكرنه كورد كوژی یان برا كوژی نه‌بوو؟ ئه‌رێ پارتی وه‌ك حزب و خه‌لك ژ نه‌ته‌وه‌یا كورد نه‌بوون؟
ئه‌رێ خێره د نها دا هه‌موو كوڕو سمینارێن وان ل سه‌ر دژایه‌تیكرنا كورد كوژیێ، پێشمه‌رگێن پارتی كورد نه‌بوون؟ ئه‌رێ هه‌مان هێز و ئالیه نه‌بوون كو ئاراسته‌یا تڤه‌نگێن خوه به‌ر ب هێزێن پارتی كرین و گۆتین گه‌ر هوون بۆ كه‌ركووكێ بكن دێ به‌رهنگاری وه بین؟ ئاخر نیفاقا سیاسی و نه‌ته‌وه‌یی ژی ئه‌ته‌كێن و نهێنیێن خوه هه‌نه، لێ ب مخابنی ڤه ئه‌ڤ هێز و ئالیه ب رۆژا رۆناك یێ ڤێ نیفاقێ دكن. ئه‌ڤا مه گۆتی هیچ هاندان و پشته‌ڤانیه‌ك نینه بۆ شه‌ڕێ كوردكوژیێ نه ژ لایێ پارتی و نه ژی ژ ئالیێ په‌كه‌كێ ڤه، لێ پێدڤیه رویێ راسته‌قینه‌یی وان ب ناڤ چالاكڤان و هێزێن سیاسی بۆ خه‌لكی دیار بیت، بزانن كوردایه‌تی هند بارێ وان نینه به‌لكو پتر فرۆتنا كوردایه‌تیێ یه ب خه‌لكێ پارتی،كو ب مخابنی ڤه وه‌ك مه زۆر جاران گۆتی باجا هیچ ئالیه‌ك ژ وان و باجا پارتی و په‌كه‌كێ كێمتر نابت ئه‌گه‌ر خودێ نه‌كری شه‌ر بهێت رویی دان.
