نیهاد حەمدی: لاوێن زاخۆ دیرۆک تۆمارکر و پاشەرۆژەکا گەشن
عەلی حاجی:
بۆ ئێکەمین جار د دیرۆکا خوە دا تیما یانەیا زاخۆ یا ل بن ژیێ ١٩ سالیێ دا گەهشتنە یارییا دووماهییا خولا ئیراقێ یا فوتبۆلێ پشتی د هەردو یاریێن هاتن و چوونێ دا شیایی ل سەر کیستێ یانەیا جەوییە دەربازبیت و بڕیارە یارییا فینالێ بەرانبەر یانەیا مینا یا بەسرایی بکەت.
نیهاد حەمدی ڕاهێنەرێ تیما زاخۆ بۆ رۆژنامەیا ئەڤرۆ دیار کر دەما من تیم وەرگرتی د قۆناغەکا خراب دا بوو ژبەر هندێ هەرزوو من ل سەر هندەک خالێن گرنگ کار کر دا بشێم ڤێ تیمێ ڤەگەرینمە سەر ڕێیا دروست، بۆ دەما چاردە یارییایە تیما مە باشترین ئاست یێ پێشکێش دکر و شیا د ١٢ یارییان دا سەرکەڤتنێ تومار بکەت، ئەڤە وێ چەندێ دگەهینیت تیما مە ژ هەژی یارییا دووماهیێ یە، ل هەردو یاریێن هاتن و چوونێ دا بەرامبەر تیما ئەلقوە جەوییە مە باشترین ئاستێ خوە پێشکێشکر و شیا خوە بگەهیننە یاریا دووماهیێ، چوونا تیما مە بۆ فینالێ دیرۆکییە و ڤێ تیمێ پاشەرۆژەکا باش هەیە ژبەرکو هندەک یاریزان ئەو ئاستێ پێشکێش دکەن نە یێ ژیێ لاوانە.
ناڤبری گۆت ژی: سەر بلندییە بۆ یانەیەکا کوردی بشێت ڤێ چەندێ بکەت و خوە بگەهینتە یارییا دووماهیێ ژ خولا ئیراقێ، مە باوەرییەکا مەزن هەیە د یاریا دووماهیێ ژی دا دێ ئاستەکێ باش و راستەقینە پێشکێش کەین و پشتەڤانیا کارگێریا یانەیێ ژی گەلەک گرنگ بوو و هەتا مە شیایی بگەهیننە ڤێ قوناغێ.
