نیڤا سێیێ خەلاتكرنا باشترینێن سالێ
ئیحسان حەسەن
ئاهەنكا هەلبژارتنا باشترینێن سالا 2024ێ و خەلاتكرنا وەرزشڤانێن خودانێن دەستكەڤتێن وەرزشی ئێك ژ پێنگاڤ و چالاكیێن گرنگ و پیرۆزە ئەوا لژنەیا ئۆلمپی تایێ دهۆكێ هاڤێژتی، دڤێ ئاهەنگێ دا ئەوا باشترین یاریزانێن سالێ لسەر ئاستێ كوڕان و كچان دگەل باشترین راهێنەر و تیما سالێ هاتینە دیاركرن، پشت بەستن لسەر هژمارەكا پیڤەرێن هەلسەنگاندنێ هاتە كرن، پێكهاتی بوون ژ ئامار و ناسناڤێن یاریزانان یێن كەسوكی و دگەل تیمێ و ناڤ و دەنگییێ، هەر ئەڤ پیڤەرەن سەرەكی نە یێن كو جیهان هەموو بۆ هەلبژاتنا باشترینێن خوە لسەر دچیت، ژبلی خەلاتكرنا باشترین وەرزشڤانێن سالێ لسەر ئاستێ هەر فیدراسیونەكا وەرزشی ئەوێن جودا ناڤێن باشترینێن خوە پێشكێشی لژنەیا هەلبژارتنێ برێكا لژنەیا ئۆلمپی كرین، یێ كو ئەم دلخۆش كرین دڤێ ئاهەنگێ دا، بلندبوونا رێژەیا وان قارەمان و راهێنەران بوون ئەوێن هەڤركی لسەر ناسناڤێ باشترینان دكرن كو دگەهشتنە 37 وەرزشڤانان، ئەڤە وێ چەندێ دیاردكەت دەستهەلاتا هەرێما كوردستانێ و پارێزگەها دهۆكێ پووتەكێ تایبەت ب كەرتێ وەرزشێ ددەت، نە تنێ ب هاندانا كەنجێن خوە بۆ كرنا وەرزشێ، بەلكو ژبۆ تۆماركرنا دەستكەڤتێن وەرزشی و بلندكرنا ئالایێ كوردستانێ د هەلكەڤتێن وەرزشی یێن نافخویی، دیسان یێن هەریمی تا دگەهیتە یێن جیهانی، ئەڤرۆكە مە ل سنۆرێ پارێزگەها دهۆكێ و ئیدارا سەربەخویا زاخۆ، ژبلی كو مە یاریزان و راهێنەرێ دەولەتی هەنە، مە خودان دەستكەڤتێن وەرزشی ژی هەنە، ئەگەر پووتە پتر پێ بهێتەدان و پشتەڤانییەكا دارایی یا باشتر بۆ بهێتە كرن، دێ شێن ئەنجامێن مەزنتر بدەستڤە ئینن، هەرچەندە پارێزگەها دهۆكێ ب تایبەت ل بیست و پێنچ سالێن داویێ، ئەگەر ئەم شەرێ داعش و ماوەیێ هاتنا پەتایا كورۆنایێ ژێ بینە دەر، وەرزشڤانێن پارێزگەهێ شیاینە جوانترین وێنێن قارەمانییێ نیشانبدەن، هەر ئەڤە بۆ ئەگەرێ هندێ كو دەستهەلاتا هەرێما كوردستانێ پتر پووتەی ب ژێرخانەیا وەرزشی ژ یاریگەه و هۆلێن دائێخستی بدەت، پشتەڤانییێ ل وەرزشڤانێن كوردستانێ و پارێزگەهێ بكەت كو پشكداریێ دهەلكەڤتێن دەولەتی دا بكەن، بۆ هندێ ئاستێ وان باشتر لێ بهێت و پتر پێشكەڤن، ئەڤ پێنگاڤا هاتیە هاڤێژتن نامەیەكا بهێزە بۆ وەرزشڤانان كو خەباتا وان دمەیدانێن وەرزشی دا جهێ رێزگرتنێ نە، ئەڤ ئەنجامە دێ بنە پالدەرك بۆ هەڤالێن وان پتر دەستكەڤتێن وەرزشی بدەستڤە بینن، ل دووماهییێ یا من دڤێت بێژم، سۆپاس بۆ لژنەیا ئۆلمپی تایێ دهۆكێ بۆ رێكخستنا ڤێ چالاكییێ، سۆپاس بۆ پارێزگارێ دهۆكێ كو ئەركێ پشتەڤانییا ڤێ ئاهەنگێ ب ستویێ خوەڤەگرتی، سۆپاس بۆ فێدراسیون و یانەیێن وەرزشی بۆ چاڤدێریا بەردەوام بۆ ڤان قارەمانان، ب هیڤیا هندێ هەر سال ئەڤ ئاهەنگە ب هژمارەكا دەستكەڤتێن مەزنتر بهێتە ساخكرن.
