نیڤا سێیێ كاپتنێ تیمێ
ئیحسان حەسەن
گۆمان تێدا كاپتنێ تیمێ رۆلەكێ تایبەت و سەرەكی دناڤا هەموو تیمێن وەرزشی دا دگێریت، گرنگییا وی پتر ددەمێن ڤەبر دا دیار دبیت، دەمێ دبیتە هاریكار بۆ سەركەڤتنا تیما خوە لسەر تیمێن هەڤرك، یێن كو بەرێ خوە ددەنە وەرزشێ ب تایبەت فوتبۆلێ باش دزانن كو كاپتنێن تیمان شیاینە دچەندین هەلویستان دا كارتێكرنا خوە یا پوزتێف بۆ ئێكلاكرنا ئەنجامێ یاریان دیسان قارەمانییان دیاربكەن، ئەڤ چەندە دهێتە پێش ئەگەر كاپتنێ تیمێ ئەڤ ساخلەتە لدەف هەبن، یا ئێكێ خودان كەسایەتییەكا بهێز بیت كو بشێت هەڤالێن خوە رازی بكەت گوهێ خوە بدەنە هەموو راسپاردێن وی بجهبینن ددەمێ یاریان دا، یا دویێ بشێت كونترۆلا رەفتارێن هەڤالێن خوە یێن تیمێ ژدەرڤەی یاریگەهێ و دناڤا یاریگەهێ دا بكەت، ئەڤ چەندە ژی دێ دبیتە ئەگەرێ رێكوپێكییا تیمێ هەمییێ ب تایبەت دەمێ سەرێ خوە بلند دكەت و تیما وی یا پاشكەڤتی بیت ب گۆلەكێ یان دو گۆلان و هاندانا هەڤالێن خوە بكەت بۆ كرنا یاریێ و ڤەگەراندنا ئەنجامی، یا سێیێ شەری لسەر تەپێ بكەت تا كو فیركا دادڤانێ یاریێ دهێتە لێدان، ئەڤەژی دێ بیتە ئەگەرێ هندێ كو تیمێ هەمییێ هانبدەت پێكڤە بەرگیریێ و هێرشبرنێ بكەن بۆ هندێ گۆلەكا كوژەك تۆماربكەن و تیما خوە بەرەڤ سەركەڤتنێ ببەن، یا چارێ بشێت هەڤالێن خوە لبن گڤاشتنا یاریێ دووربێخیت داكو كارتێن رەنگین نەوەرگرن و كونترۆلێ لسەر وان هەموو هەلویستان ددەمێ گونجای بكەت و كارتێكرنێ ل ئەنجامێ تیما وی نەكەت، یاچارێ بشێت كارتێكرنێ لسەر دادڤانێ یاریێ ب ئاخڤتنێن خوە یێن جوان بكەت، رێزێ ل بڕیارێن وی بگریت وەبكەت كو نەكەڤیتە لبن گڤاشتنا دەرونی دل رەوكییێ و بریارێن شاش دژی تیما وی بدەت، یا پێنجێ خودان شارەزاهییەكا باش بیت بشێت پلانێن راهێنەرێ تیمێ یێن تەكتیكی و تەكنیكی بجه بینیت و هاریكار بیت بۆ چارەسەكرنا هەر روودانەكێ ئەوا دناڤبەرا یاریزان دا پەیدادبیت، دیسان ببیتە پرەكا پەیوەندییا باش دناڤبەرا یاریزان و راهێنەری دا، چونكو ساخلەتێن گرێدای كاپتنێ تیمێ گەلەك زێدەترن ژوان یێن كو مە ئیشارەت پێ داین، لێ ئەوا ئەم تێبینی دكەن كو گەلەك ژ یانەیێن مە نیشانا كاپتنێ تیمێ پێشكێشی كەڤنترین یاریزانێن خوە دكەن، هندەكێن دی ژی ددەنە ستێرەكا خوە یا نافخو سەرباری هەبوونا هژمارەكا ستێرێن باشتر یێن بیانی دناڤ رێزێن واندا، ل دووماهییێ یا من دڤێت بێژم چونكو بەرپرسیارەتییا كاپتنێ تیمێ گەلەك یا مەزنە ژبۆ گەهشتنێ ب ئارمانجان، پێدڤییە هەلبژارتنا وی لسەر ڤان بنەمایان بیت، بۆ هندێ تیمێن مە باشترین ئەنجامان دناڤا یاریگەهان دا بدەستڤە بینن.
