نیڤا سێیێ پیرۆزە ناسناڤێ باسكێت بۆلا كوردستانێ
ئیحسان حەسەن
بدەستڤە ئینانا تیما باسكێت بۆلا یانەیا زاخۆ ناسناڤێ خولا هەرێما كوردستانێ بۆ جارا پێنجێ لدویڤئێك، دهێتە هژمارتن ئێك ژ دەستكەڤتێن كێم وێنە بۆ وەرزشا ئیدارا سەربەخویا زاخۆ، ئەوێن نها بووینە ناڤەكێ دیار ل ئەسمانێ ڤێ یاریێ نەتنێ ل كوردستانێ بەلكو ل ئیراقێ ژی، بێ نەڤێت ئەڤ دەستكەڤتە ژڤالاهییێ نەهاتیە بەلكو ژ ئەنجامێ راهێنانێن بەردەوام ب سەرپەرشتییا باشترین راهێنەرێ سالێ ل پارێزگەها دهۆكێ كاپتن جوتیار عەلی ئەوێ ب پلانێن خوە یێن زانستی و شارەزاهییا خوە یا چەندین سالان دچێكرنا یاریزانان دا و بەردەوامییا دانانا شەنگستێ ڤێ یاریێ ل یانەیا خوە، دیسان ب كار ئینانا رێكێن نوو یێن راهێنانێ، دیسان هەبوونا هژمارەكا یاریزانێن زیرەك و خودان شیان ئەوێن نها بەرەڤانییێ ژناڤێ یانەیا خوە ل هەردوو مەیدانین ئیراقێ و كوردستانێ دكەن، كو سێ ژوان بەری نها بۆ هەلبژارتیێن ئیراقێ هاتینە داخوازكرن، ئەوژی موراد عەلی، زنار هشیار، محەمەد عەلی، دگەل هەر ئێك ژ جەگەر عەلی، ئیهاب و فەرید رەعدی دگەل هژمارەكا یاریزانێن دی ئەوێن نها هەموو كوردستان شانازیێ پێ دبەن، هەروەسا پشتەڤانییا بێ سنۆرا كارگێریا یانەیێ ئەوا چ كێمترخەمی نەكری دبەرهەڤكرنا هەر تشتەكێ پێدڤی بۆ سەركەڤتنا كاروانێ ڤێ تیمێ هاتیە پێش، بەلێ دڤێت ئەم رۆلێ جەماوەرێ یانەیێ ژی ژبیر نەكەین ئەوێن بەردەوام هاندانا تیما خوە دكەن ژبۆ تۆماركرنا سەركەڤتنان و گەهشتن ب دەستكەڤتان، بەلێ یا من تێبینی كری دخولا ڤی وەرزی دا، رێژا پشكدارییا بوو كو براستی گەلەك یا كێمە بوو ئەگەر ئەم براوەرد بكەین دگەل هژمارا وان یانەیان ئەوێن نها مە ل كوردستانێ هەین، ژبلی هندێ شێواز و سیستەمێ خولێ ئەوا نها فیدارسیونا باسكتبۆلا كوردستانێ لسەر دچیت و هاتیە پەیرەكرن دخولا ڤی وەرزی دا، نا كەڤیتە د بەرژوەندیا بلندبوونا ئاستێ تەكنیكی و تەكتیكی یێن تیمێن پشكدار دا، ب تایبەت وان تیمان یێن كو تنێ دخولا كوردستانێ دا یاریێ دكەن، ژبەر كو رێژا یاریان یێن كو ئەنجام ددەن دخولێدا گەلەك یا كێمە، لەوما پێدڤییە گوهارتن دسیستەمێ خولێ دا بهێتە كرن، پێدڤییە تیمێن پشكدار ب كێماتی سالانە پتر ژ 20 یاریان برێكا هاتن و چوونێ بكەن بۆ هندێ شیانێن وان یێن یاریێ بلندتر لێ بهێن و ئاستێ هەڤركییێ ژی بهێزتر لێ بهێت، ژبلی هندێ دگەل ڤێ خولێ پێدڤی یە خول لسەر ئاستێ پێگەهشتییان و لاوان ژی بهێنە ڤەكرن، ژبۆ بەردەوامییا شەنگستێ ڤێ یاریێ ل كوردستانێ، بۆ ڤێ ژی پێدڤییە لژنا ئۆلمپی یا كوردستانێ بودجەكێ تایبەت بۆ برێڤەبرنا بەرنامەیێ ڤێ فێدراسیونێ بدرێژاهییا سالێ بدانیت، داكو بشێت ئەوا پێدڤی لسەر بجه بینیت، بەلێ هەر دێ مینیت پاراستنا ڤێ دەستكەڤتێ بۆ سالا پێنجێ لدویڤئێك ژلایێ كورێن خابیری ڤە، سەركەڤتنا ژ هەموویان مەزنتر.
