نێزیكی چار هزار بیرێن ئاڤێ ل پارێزگه‌ها دهۆكێ هاتینه كۆلان
دهۆك، له‌زگین جوقی:
رێڤه‌به‌رێ ئاڤا ژێرزه‌ڤی ل پارێزگه‌ها دهۆكێ دیار كر كو ئه‌ڤ ساله داخوازیا جۆتیاران بۆ كۆلانا بیرێن ئاڤێ زێده‌بوویه و دبێژیت: هه‌تا نوكه 300 جۆتیاران داخوازی بۆ كۆلانا بیرێن ئاڤێ پێشكێشی لایه‌نێن په‌یوه‌ندیدار كرینه.
ناجی ئیبراهیم، رێڤه‌به‌رێ ئاڤا ژێرزه‌ڤی ل پارێزگه‌ها دهۆكێ ب وه‌كاله‌ت بۆ رۆژناما ئه‌ڤرۆ گۆت: “ژ به‌ر هشكه‌سالیێ حكومه‌تا هه‌رێما كوردستانێ گه‌له‌ك ئاسانكاریان بۆ جۆتیاران دكه‌ت، ب تایبه‌تی ژی د وارێ كۆلانا بیرێن ئاڤێ دا بۆ مه‌ره‌مێن چاندنێ، ئه‌ڤ ساله هه‌تا 300 جۆتیاران داخوازا كۆلانا بیرێن ئاڤێ كرینه بۆ كارێن چاندنێ، چه‌ندین مه‌رج هاتینه دانان و ل دووڤ وان مه‌رجان رێ ب جۆتیاران دهێته دان بیرێن ئاڤێ ب كۆلن، مه‌رجێن گرنگ ژی ئه‌ون: جۆتیاری چه‌ند دۆنمێن ئه‌ردی هه‌نه، هه‌روه‌سا دووراتی د ناڤبه‌را بیرێن ئاڤێ دا چه‌نده، پشتی ڤه‌دیتن دهێنه ئه‌نجامدان رازیبوون ل سه‌ر داخوازیێن جۆتیاران دهێته كرن بۆ كۆلانا بیرێن ئاڤێ”.
ئاشكرا ژی كر كو ئه‌ڤ ساله هێشتا باران نه‌بارینه و رێژا ئاڤا ژێرزه‌ڤی گه‌له‌ك كێمبوویه، ل هنده‌ك جهان 10 مه‌تران ئاستێ ئاڤا ژێرزه‌ڤی كێمبوویه، ئه‌ڤێ چه‌ندێ ژی كارتێكرن ل سه‌ر بیرێن ئاڤێ كریه و ل گه‌له‌ك ده‌ڤه‌ران ئاڤ كێمبوویه و ژ نه‌چاری بۆری ل سه‌ر بیرێن ئاڤێ هاتینه زێده‌كرن.
ناجی ئیبراهیم گۆت: “ل سه‌رانسه‌ری پارێزگه‌ها دهۆكێ سێ هزار و 500 بیرێن ئاڤێ هه‌نه، گه‌له‌ك ژ وان بیران بۆ مه‌ره‌مێن ڤه‌خوارنێ دهێنه بكارئینان و هنده‌ك ژی بۆ كارێن چاندنێ دهێنه بكارئینان”.
