نێزیكی 100 فلمان دێ پشكداریێ د فلمە فەستیڤالا دهۆكێ دا كەن
زنار تۆڤی:
بەرپرسێ پشكا راگەهاندنێ ل گەڕا دەهێ یا فلمە فەستیڤالا دهۆكێ یا نێڤدەولەتی، د دیدارەكێ دا بۆ رۆژناما ئەڤرۆ دیاركر كو ل رۆژا 9/12/2023 ئەو فەستیڤال دێ دەستپێكەت و هەتا (16) هەیڤێ دێ یا بەردەوام بیت.
حەسەن عارف، گۆت: ل دەهی خزیرانا ئەڤ سالە مە دەرگەهێ وەرگرتنا فلمان ڤەكربوو، د سێ هەیڤان ب رێیا ئۆنلاین، نێزیكی 500 فلمێن كوردی و بیانی هاتبوونە هنارتن، ل گەل 200 فلمێن دی كو ب رێكێن فەستیڤالان هاتبوونە پێشكێشكرن، د دووڤدا لژنا دەستنیشانكرنا فلمان دەست ب كارێ خۆ كر و نێزیكی 100 فلمان دیاركرینە، كو ئەو ژی فلمێن درێژ و كورت و بەلگە فلمن، پەیاما ئەڤ سالە زمانێ كوردی یە، كو چەندین دیالێكت هەنە، دیسان چەندین دەرهێنەرێن كورد هەنە، ل كوردستانێ و دەرڤەی كوردستانێ فلمان بەرهەم دئینن، بەلێ ب زمانێ بیانی وان فلمان چێدكەن، ئەڤە ژی پەیامەكە بۆ وان دەرهێنەران، كو ئێدی ئەو ژی فلمێن خۆ ب زمانێ كوردی چێكەن، داكو زمانێ مە یێ كوردی هەر زیندی ب مینیت، هەروەسا ئەڤ سالە وەلاتێ فرەنسا ب چەندین فلمان یا پشكدارە و پشكا فلمێن زارۆیان ژی هاتییە دانان، هەروەسا پشكا فلمێن كلاسیك ژی هەیە و هەردو پشكان دێ دەه فلم هێنە نیشادان
