نێزیكێ 50 هزار كه‌سان ل كوردستانێ ماددێن بێهوشكه‌ر بكاردئینن
دهۆك، نه‌وزاد هلۆری:
ب مه‌ره‌ما نه‌هێلان یان كێمكرنا بكارئینانا ماددێن بێهوشكه‌ر، پشكا سسیولوجی یا زانكۆیا دهۆكێ د چالاكیه‌كێ دا به‌حس ل ماددێن بێهوشكه‌ر و ئه‌گه‌ر و چاره‌سه‌ریێن وێ كر، ماموستایه‌كا زانكۆیێ ژی دده‌ته دیاركرن كو ل هه‌رێما كوردستانێ نێزیكێ 50 هزار كه‌سان ماددێن بێهوشكه‌ر بكاردئینن و رێژه دزێده‌بوونێ دایه.
د.زوبه‌یدا سه‌ید سالح ماموستایا زانكۆیا دهۆكێ دیار كر كو بكارئینان و بازرگانی كرن ب ماددێن بێهوشكه‌ر ل هه‌رێما كوردستانێ د زێده‌بوونێ دایه و گۆت: (زێده‌بوونا وان نه‌ك ب تنێ ل كوردستانێ بویه به‌لكو ل سه‌ر ئاستێ جیهانێ یه ب تایبه‌تی ل ڤان 10 سالێن دووماهیێ، هه‌رچه‌نده ئه‌گه‌ر زۆرن، به‌لێ ئه‌گه‌رێن سه‌ره‌كی دزڤرن بۆ وێ یه‌كێ كو ژ روویێ قانونی و ئه‌منی و چاڤدێریكرنا سنوری ڤه دبیت رێك و پێكی و پاراستی نه‌بن و ب قاچاخ یان شێوازێ به‌ربه‌لاڤبوونا وان جودایه، به‌لێ ل گه‌ل ڤێ یه‌كێ ژی دڤێت ب هه‌موو ئاستانڤه كار بهێته كرن بۆ ژناڤبرن یان ژی كێمكرنا وان).
دكتوره زوبه‌یدایێ د به‌رده‌وامیا ئاخفتنێن خوه‌دا گۆت: (هه‌رچه‌نده چ ئامارێن فه‌رمی نینن، به‌لێ ل هه‌رێما كوردستانێ نێزیكێ 50 هزار كه‌سان بكاردئینن، له‌وا ئه‌م وه‌كو زانكۆیا دهۆكێ ل گه‌ل چه‌ند ئالیێن شوله‌ژێ كار ل سه‌ر هندێ دكه‌ین كو هشیاریا جڤاكی ب تایبه‌تی لده‌ف ته‌خا گه‌نجان دروست بكه‌ین، پاشان پێنگاڤێن كریاری بهێنه هاڤێتن).
ئومێد محه‌مه‌د تاهر، ماموستایێ زانكۆیا دهۆكێ دیار كر كو بابه‌تێ بكارئینانا ماددێن بێهوشكه‌ر ل كوردستانێ جهێ ل سه‌ر راوستانێ یه و گۆت: (جهێ داخێ یه پرانیا وان كه‌سێن كو ماددێن بێهوشكه‌ر بكاردئینن گه‌نجن، كارتێكرنێن خراب ل سه‌ر ده‌روون و ساخله‌میا وان دكه‌ت و چه‌ندین پێرابوونێن قانوونی و جڤاكی ژی ل گه‌ل وان كه‌سان دهێنه كرن، ژ روویێ قانوونی ڤه هه‌رچه‌نده بزاڤ هاتینه كرن بۆ دانانا سنوره‌كێ بۆ كێمكرن یان نه‌هێلانا وان به‌لێ دیسان ژی ئه‌ڤ یه‌ك هێشتا بنبر نه‌بویه، به‌روڤاژی د زێده‌بوونێ دایه ب تایبه‌تی بازرگانیكرن).
ماموستا ئومێد گۆتژی: (ل گوره‌ی قانوونێ بازرگان و بكارهێنه‌ران ژی سزایێن توند و گران هه‌نه هه‌تا خوه دگه‌هیته ئاستێ سێداره‌دان و زیندانا هه‌تا هه‌تایێ، به‌لێ بۆ بكارهێنه‌ران د نوكه دا سزایێن وان هاتینه سڤكرن، ژبه‌ركو بزاڤ هه‌یه كو چاره‌سه‌ر بكه‌ن نه‌ك سزا بده‌ن، دڤێت سه‌نته‌رێن چاره‌سه‌ركرنێ ل كوردستانێ بهێنه دروستكرن، هه‌رچه‌نده ل گوره‌ی پێدڤیاتیێ هه‌نه ب تایبه‌تی ل ناڤه‌ندێن ساخله‌میێ داكو جاره‌كا دی ڤه‌گه‌رن ره‌وشا به‌رێ و دوور بكه‌ڤن، به‌لێ یا گرنگ ئه‌وه ئه‌و سه‌نته‌ره بهێنه دامه‌زراندن داكو زورترین هژمارا تووشبوویان بهێنه چاره‌سه‌ر كرن).
ئیسرا محه‌مه‌د ئه‌مین، قوتابیه ل زانكۆیا دهۆكێ دیار كر كو رولێ خێزانێ و جڤاكی ب گشتی د به‌رهنگاربوونا بكارئینان و بازرگانیكرن ب ماددێن بێهوشكه‌ر روله‌كێ كارتێكه‌ره و گۆت: (دڤێت خێزان ب سه‌ره‌ده‌ریه‌كا هه‌ره نازك و هه‌ستیار ره‌فتارێ ل گه‌ل وان كه‌سان بكه‌ن یێن كو تووشی بكارئینانا وان بویه، نابیت بهێنه پاشڤه برن داكو زێده‌تر نێزیك نه‌بیت، دیسان راگه‌هاندن و په‌روه‌رده و ئالیێن ئایینی هه‌موو پێكڤه روولێ خوه ببینن)
دانه‌ر عوبه‌یدولا، قوتابیه ل زانكۆیا دهۆكێ سه‌باره‌ت بابه‌تی گۆت: (بابه‌تێ چاره‌سه‌ركرنا بازرگانی و بكارئینانا ماددێن بێهوشكه‌ر نه تشته‌كێ ب ساناهیه و پێدڤی ب چه‌ند قوناغایه، ده‌ستپێكێ تووشبوو بهێته دوور كرن، پاشان چاره‌سه ركرن و ڤه‌گه‌راندن بۆ ناڤ جڤاكی ل وی ده‌می دڤێت جڤاك ژی زۆر یێ هاریكار بیت بۆ كه‌سێ تووشبویی ب تایبه‌تی ژ روویێ ده‌روونیڤه).
