نێزیك ئه‌رزاقێ ئه‌ڤ ساله دێ هێته به‌لاڤكرن
هه‌ولێر، قائید میرۆ:
بڕیاره ئه‌ڤ ساله ئه‌رزاقێ به‌لاڤكرنێ وه‌ك خوه بهێته به‌لاڤكرن و رێڤه‌به‌رێ گشتیێ بازرگانی ژی دبێژیت: بلندبوونا بهایێ ئه‌رزاقی ل بازاڕێن هه‌رێما كوردستانێ بۆ ڤێ چه‌ندێ ڤه‌دگه‌ڕیت، د سالا بۆری دا ئه‌رزاق وه‌ك پێدڤی نه‌هاتیه به‌لاڤكرن.
نه‌وزاد شێخ كامل، رێڤه‌به‌رێ گشتیێ بازرگانی بۆ رۆژناما ئه‌ڤرۆ دیار كر، ئه‌گه‌رێن بلندبوونا بهایێ ئه‌رزاقی ل بازاڕی بۆ گیرۆبوونا ئه‌رزاقێ به‌لاڤكرنێ ڤه‌دگه‌ڕیت، چونكی ئه‌گه‌ر هه‌یڤانه ئه‌رزاق د ده‌مێ خوه دا بهێته به‌لاڤكرن دێ كاریگه‌ری ل سه‌ر بازاڕی هه‌بیت و گۆت: “مخابن سالا بۆری بتنێ ئه‌رزاقێ پێنج هه‌یڤان هاتیه به‌لاڤكرن، ئه‌ڤه ژی بوویه ئه‌گه‌رێ بلندبوونا بهایێ ئه‌رزاقی، به‌روڤاژی ئه‌گه‌ر 10 هه‌یڤان بهێته به‌لاڤكرن دێ كاریگه‌ری ل سه‌ر بازاڕی هه‌بیت و وه‌لاتی ژی نه‌چار نابن ئه‌رزاقی ل بازاڕی بكڕن”.
نه‌وزاد شێخ كامل گۆتژی: “نوكه ل پارێزگه‌هێن باشوور ده‌ست ب به‌لاڤكرنا پشكا هه‌یڤا ئێك هاتیه كرن و هنده‌ك ئه‌رزاق ژی گه‌هشتیه عمبارێن هه‌رێما كوردستانێ و بۆ پشكنینێ هاتیه هنارتن، بتنێ نوكه ئار دهێته به‌لاڤكرن و هه‌موو ئاشان ئار هه‌یه و نێزیكه پشكا سالا بۆری ب دووماهی بهێت و ئێكسه‌ر پشكا هه‌یڤا ئێك یا ئه‌ڤ ساله دێ هێته به‌لاڤكرن”.
