نێزیکی ٦٠ سالایە قەلیێ چێدکەت
ئەڤرۆ، زنار تۆڤی:
محەمەد سیاری قەلیفرۆشێ بەرنیاسێ دھۆکێ، د دیدارەکێ دا بۆ رۆژناما ئەڤرۆ دیارکر کو ل سالێن شێستان وی کارێ چێکرنا قەلیێ کرییە کو ل دەستپێکێ ل باژێرێ مووسل بوو ل بەر دەستێ ھۆستایەکێ چێکرنا قەلییێ ب ناڤێ (سەید دەنوون) کارکریە کو ل وی دەمی وی رۆژانە ب دو دەرھەمان و جاران ژی ب سێ دەرھەمان کار دکر، ل وی دەمی غاز نەبوو، وان قەلی ل سەر قۆرمێن داران و رەژییێ چێدکر.
ناڤھاتی گۆت: ھەتا سالا حەفتێیێ ل سەر وی کاری یێ بەردەوام بوو، پاشی ل ھەمان سال ھاتییە باژێرێ دھۆکێ، شەش سالان چوویە گوندێ خوە ل سیارێ، پاشی ل سالا ١٩٧٦ جارەکا دی ھاتییە دھۆکێ و خوارنگەھەکا قەلییێ ڤەکرییە، ھەتا نوکە ل سەر یێ بەردەوامە، رۆژانە دھێتە خوارنگەھا خوە سەرپەرشتییا کارێ خوارنگەھێ دکەت، و دەمەکە کورێن وی خوارنگەھێ برێڤە دبەن، و ب گۆتنا وی ل سالێن نۆتان کارێ وان باشتر بوو، چنکو نوکە کرێ یێن گران بووین.
