نەتەوێن ئێکگرتى ئامارێن شوكهێنه‌ر ده‌رباره‌ى تووندوتیژیا ل دژی ژنان به‌لاڤكرن
ئه‌ڤرۆ نیوز:
نەتەوێن ئێکگرتى كۆمه‌كا ئامارێن شۆکهێنەر ل سالڤه‌گه‌را بەرهنگاربوونا تووندوتیژیێ ل دژى ژنان به‌لاڤكرینه.
سکرتێرێ گشتی یێ نەتەوێن ئێکگرتى ب ناڤێUNiTE که‌مپینه‌ك بۆ دووماهى ئینانێ ب تووندوتیژیێ ل دژى ژنان دەستپێکرینە، ئەم هه‌لكه‌فته ل 25 نۆڤەمبەرێ دەستپێدکه‌ت و بۆ ماوێ 16 رۆژان دێ یا بەردەوام بیت.
دروشمێ ئه‌ڤ ساله ژى هاتیه ناڤكرن ب “جیهانێ پرتەقالی بکەن: پالپشتیا دارایی بێخنه به‌رچاڤ، به‌رسڤێ بده‌ن و رێگریێ بکەن و زانیاریان کۆم بکەنەڤە”.
نەتەوێن ئێکگرتى ئاماژە ب هندێ دایه ل سەردەمێ کۆڕۆنایێ دا تووندوتیژی ل دژى ژنان زێده‌بوویه، ل سالا بورى 18٪ یا ژن و کچان روو ب ڕوو دەستدرێژیا سێکسی یان تووندوتیژیا جەستەیی بووینە.
نەتەوێن ئێکگرتى دبێژن، ل هەر سێ هه‌یڤێن قەدەغه‌یا هاتنوچوونێدا، 15 ملیۆن ژن روو ب روو تووندوتیژیێ بووینه.
ئامارێن تووندوتیژیێ ل دژى ژنان :
35٪ی ژنێن جیهانێ ب كێمى جاره‌كێ روو ب روو تووندوتیژیا جەستەیی، سکسی، خێزانی یان ژى یا دەرەڤەی خێزانێ بووینه.
پەیوەندیکرن ب هێلا گەرم ل سەر روودانێن تووندودتیژیێ ل هنده‌ك وه‌لاتان پێنج جاران هندى به‌رى نوكه زێده‌بووینه.
قەدەغه‌یا هاتنوچوونێ و نه‌سەقامگیریا ئابووری تووندوتیژی ل دژى ژنان زێده‌کریە.
48 وه‌لاتان بەرهنگاربوونا تووندوتیژیی خستیه ناڤ بەرنامێ بەرهنگاربوونا کۆڕۆنایێ.
رۆژانە 137 ژن ژ ئالیێ ئەندامه‌كێ خێزانا وان ڤه دهێنه كوشتن.
40٪ یا وان ژنێن تووشى تووندوتیژیێ دبن، داخوازیا هاریكاریێ دکەن.
155 وه‌لاتان قانونا بەرهنگاربوونا تووندوتیژیا ل دژى ژنان پەسەندکرینە.
140 وه‌لات خودانێن قانوونا بەرهنگاربوونا تووندوتیژیا سکسینه.
ژن 49٪ یا بازرگانیکرنێ ب مرۆڤان پێکدئینن.
ل 2019 دا هه‌ر ژ پێنج ژنان ئێكێ به‌رى ژیێ 18 سالیێ شووكریه.
200 ملیۆن کچ و ژنێن د ژیێ 15-49 سالیێ دا، ل 31 وه‌لاتێن جیهانێ هاتینه خەتەنەکرن.
15 ملیۆن کچ د ژیێ 15-19 سالیێ دا، رووب روو سکسیا ب زۆرى بووینه.
ل رۆژهەلاتا ناڤین، 40-60 یا ژنان ل سەر جادان روو ب روو جۆره‌كێ ژ دەستدرێژیا سکسی بووینە.
