نەتەوێن ئێکگرتی: رژێما سووریێ تاوانێن شەری ئەنجام داینە
ئەڤرۆ:
کۆمیسیۆنا ڤەکۆلینێن سووریێ یا سەر ب نەتەوێن ئێکگرتی د راپۆرتەکێ دا راگەھاند کو رژێما سووریێ تاوانێن شەری ل دژی وەلاتیێن سڤیل ئەنجام داینە و چەکێن قەدەغەکری ژی د سالێن بۆری دا بکار ئینایە و ژ بەر ھندێ ژی دڤێت بابەتێ بنپێکرنا مافێن مرۆڤی و تاوانێن شەری یێن رژێما سووریێ نەھێتە ژبیر کرن و کار ل سەر بھیتە کرن.
د راپۆرێ دا ھاتیە کو ھەتا نھا چارەنڤیسێ ب دەە ھزاران کەسێن کو ژ ئالیێ ھێزێن حوکمەتا سووریێ ڤە ھاتینە گرتن، دیار نینە و گەلەک ژ وان ب زۆرێ ھاتینە زیندانی کرن، چارەنڤیسێ ب ھزاران کەسان ھەتا نھا ژی دیار نینە، رژێما سووریێ ب نھێنی گەلەک کەس کوشتینە و بەلگێن تاوانێن خوە ژی ژناڤبرینە، ژ بەر ھندێ ژی دڤێت جارەکا دی دەست ب ڤەکۆلینان ل دۆر بنپێکرنا مافێن مرۆڤی و کوشتنا وەلاتیێن سڤیل ل سووریێ بھێتە کرن، دڤێت وەلاتێن ئەندامێن ئاسایشا نەتەوێن ئێکگرتی رۆلەکێ بەرچاڤ بۆ ئاشکراکرنا راستیێن شەرێ ل سووریێ بگێرن و ھەموو راستیێن ھەی بۆ رایا گشتی یا جیھانێ ئاشکرا بکەن.
کۆمیسیۆن ڤەکۆلینێن سووریێ ھەروەسا د راپۆرتا خوە دا دیار دکەت کو رژێما سووریێ ب ھزاران کەس زیندانی کرینە، ھەتا نھا ژی کەسوکارێن وان نزانن کا زارۆیێن وان ل کیڤە نە؟ رێ نادەن ئەو سەرەدانا مرۆڤێن خوە بکەن، لێ مخابن ھەتا نھا د راگەھاندنا جیھانی دا وەکو پێدڤی بەحسێ ڤی بابەتی نەھاتیە کرن و گرنگی پێ نەھاتیە دان. رژێما سووریێ ب بەھانا شەری ل دژی تیرۆرێ و پاراستنا وەلاتی خەلک ژ مافێن وان بێ پار کرینە و تاوانێن مەزن ل دژی مرۆڤاتیێ ئەنجام دایە.
ھەژی ئاماژەپێدانێ یە کو راپۆرتا کۆمیسیۆنێ ژ ٣٠ بەرپەران پێک ھاتیە و د راپۆرتێ دا ھاتیە دیار کرن کو گەلەک بەلگە ل بەر دەستان ھەنە کو دسەلمینن ژ سالا ٢٠١١ ھەتا سالا ٢٠٢٠ ب ھزاران وەلاتی ل سووریێ ھاتینە کوشتن و چارەنڤیسێ ب ھزاران کەسان ژی ھەتا نھا دیار نینە.
