نەتەوەیێن ئێكگرتی هۆشداریێ ددەتە سووریێ
بەرپرسەکێ نەتەوەیێن ئێكگرتی دیار کر، وان بەری چەند رۆژان هۆشداری داینە دەستهەلاتا شامێ کو سەرەدەریا وان ل گەل پێکهاتەیێن ل سووریێ گەلەک شاشە و وەکو نەتەوەیێن ئێكگرتی ئەو ب چو رەنگەکێ قەبوول ناکەن زۆرداری ل عەلەویان، کوردان و دورزیان بهێتە کرن و دڤێت دەستهەلاتا نوو یا شامێ سۆزێن کو بەری نها داینە بجه بینیت.
ل ئالیێ دی وەزارەتا دەرڤە یا رۆسیا ژی نەرازیبوونا خوە ل هەمبەر دستوورێ نوو یێ سووریێ دیار کر و راگەهاند، دەستهەلاتا شامێ نەشێت وەسا ئارامیێ بۆ سووریێ دابین بکەت، هەلوەستێ دەستهەلاتا نوو یا شامێ دێ بیتە ئەگەرێ ئالۆزیێن گەلەک مەزن ل سووریێ، کوشتنا عەلەویان و گرنگی نەدان ب پێکهاتەیێن دی یێن ل سووریێ دێ وی وەلاتی بەر ب چارەنڤیسەکێ نەدیار ڤە بەت.
گەلەک پارتێن سیاسی و رێکخستنێن مافێن مرۆڤی یێن ئۆرۆپا ژی نەرازیبوونا خوە ل هەمبەر دستوورێ نوو یێ سووریێ دیار کرن و راگەهاندن کو ئۆرۆپا پشتەڤانیێ ل دەستهەلاتەکا توندرەو ل سووریێ ناکەت.
