نەتەوەیێن ئێکگرتی داخوازا راگرتنا شەڕی دکەت
سکرتێرێ گشتی یێ نەتەوەیێن ئێکگرتی داخواز ژ ئسرائیلێ و رێکخستنا حەماسێ کر دووماهیێ ب شەڕێ نها بینن، چونکی ژ بەر شەڕی گەلەک وەلاتیێن سڤیل ژی بووینە قوربانی و دڤێت شەڕێ نها بهێتە راگرتن و سەرۆک وەزیرێن ئسرائیلێ ژی دیار دکەت ئەو د شەڕەکێ گران دانە و دێ شەر بۆ دەمەکێ درێژ ڤەکێشیت.
ئانتۆنیۆ گوتریش سکرتێرێ گشتی یێ نەتەوەیێن ئێکگرتی راگەهاند، ژ بەر شەڕێ چەند رۆژێن بۆری دا ناڤبەرا ئسرائیلێ و رێکخستنا حەماسێ دا زیانێن گەلەک مەزن گەهشتینە خەلکێ سڤیل و گەلەک وەلاتیێن سڤیل بووینە قوربانی، ژ بەر هندێ ژی دڤێت شەڕ بهێتە راگرتن و ب رێیا دانوستاندنان پرسێن هەی د ناڤبەرا هەر دو ئالیان دا بهێنە چارەسەرکرن.
ل ئالیێ دی پاپا فرانسیس پاپایێ ڤاتیکانێ ژی د داخۆیانیەکێ دا راگەهاند، ب شەڕی و کریارێن تیرۆرستی چو پرسەک ل جیهانێ ناهێتە چارەسەرکرن، ژ بەر شەڕی هەردەم ژن و زارۆ دبنە قوربانی، روودانێن نها ل ئسرائیلێ و غەزە روو ددەن گەلەک ب ئێشن و گۆت: (ئەز داخواز ژ ئسرائیلێ و رێکخستنا حەماسێ دکەم شەڕێ نها بدەنە راگرتن، چونکی بەردەوامیا شەڕی دێ بیتە ئەگەرێ روودانا کارەساتێن گەلەک مەزن و ئەو یەک د بەرژەوەندیا چو ئالیان دا نینە، باشترە شەڕێ نها بهێتە راگرتن).
ل ئالیێ دی سەرۆک وەزیرێن ئسرائیلێ ژی راگەهاند وەلاتی وی د شەڕەکێ مەزن دایە لێ ئسرائیلێ ئەو شیان یێت هەین و دێ دربێن کوژەک ل حەماسێ و هەر هێزەکێ دەت کو پشتەڤانیێ ل حەماسێ دکەت، ژ بەر شەرێ چەند رۆژێن بۆری هەتا نها پتر ژ سێسەد وەلاتیێن ئسرائیلێ بووینە قوربانی و چارەنڤیسێ گەلەک کەسان ژی دیار نینە، ئەو وەکو ئسرائیل خوە بۆ شەڕەکێ دەمدرێژ ئامادە دکەن، ئسرائیل دێ غەزە ب تەمامی وێران کەت و رێ نادەت ئێرشێن وەکو یێن چەند رۆژێن بۆری بهێنە دوبارە کرن.
ل ئالیێ دی فەرماندارەکێ رێکخستنا حەماسێ ژی راگەهاند، وان هەتا نها شیاینە دربێن کوژەک ل ئسرائیلێ بدەن و هەروەسا ئەو بەردەوام هێزێن خوە رەوانەی ناڤ ئاخا ئسرائیلێ دکەن، شەڕێ نها ل دژی ئسرائیلێ دێ بەردەوام بیت و هەتا ئسرائیل ب تەمامی ژ ئاخا فەلەستینێ دەرنەکەڤیت ئەو دێ شەڕی کەین.
چاڤدێرێن سیاسی ژی دیار دکەن، ئیران پشتەڤانیێ ل حەماسێ دکەت و شەڕێ نها ب فەرمانا ئیرانێ دەستپێکریە، چونکی ئیرانێ نەڤێت ئسرائیل پەیوەندیێن خوە ل گەل وەلاتیێن عەرەبی ب تایبەتی ژی عەرەبستانا سعوودی ئاسایی بکەت، ئیرانێ دڤێت رەوش هەر یا ئالۆز بیت، ئێرشێن ڤێ دووماهیێ ژ ئالیێ حەماسێ ژی ب فەرمانا ئیرانێ بوویە، ژ بەر ڤێ یەکێ ژی ئسرائیلێ دڤێت ڤێجارێ غەزە ب تەمامی وێران بکەت و ژ دەستێ فەلەستینان دەرخینیت، ئەو یەک ژی نیشا ددەت دێ شەرێ نها بۆ دەمەکێ درێژ ڤەکێشیت.
