نەتەوەیێن ئێکگرتی دلگرانیا خوە ل هەمبەر رەوشا سووریێ دیار دکەت
جێگرێ پەیڤدارێ سکرتێرێ گشتی یێ نەتەوەیێن ئێکگرتی دیار کر، ئالۆزیێن ڤێ دووماهیێ د ناڤبەرا هێزێن سەر ب ئەحمەد شەرعی و هێزێن سووریا دیموکرات ل هندەک دەڤەرێن سووریێ دا جهێ دلگرانیێ یە و هەکە ئالۆزیێن نها ب دووماهی نەهێن ئەو یەک دێ بیتە ئەگەرێ شەڕەکێ نوو ل سووریێ و گۆت: (بەری نها شەڕ ل سوەیدا هەبوو و هەکە نها شەڕ ب دووماهی نەهێت ئەو یەک دێ کاریگەریا خوە یا گەلەک خراب ل سەر پاشەرۆژا سووریێ هەبیت، چونکی نها رەوشا سووریێ گەلەک هەستیارە و دڤێت هەموو ئالی هاریکار بن دا چو شەڕێن نوو ل سووریێ روو نەدەن).
فەرحان حەق د پشکەکا دی یا ئاخڤتنا خوە دا ئەو یەک ژی دیار کر، کریارێن چەکدارێن ئەحمەد شەرعی ل سوەیدا نیشا دا لەشکرێ سووریێ ژ هندەک گرۆپێن توندرەو پێکهاتیە و بێگومان پێدڤیا سووریێ ب لەشکرەک نوو هەیە، دڤێت هەموو ئالی هاریکار بن دا هەسەدە و وەزارەتا بەرگریێ یا سووریێ بشێن پێکڤە لەشکرەکێ نوو ئاڤا بکەن و هەموو پرسێن هەی ژی د ناڤبەرا خوە دا چارەسەر بکەن، ئەو یەک ژ بۆ پاشەرۆژا سووریێ گەلەک یا گرنگە و دڤێت ب هەموو رەنگەکێ کار بکەین دا چو شەڕێن نوو ل سووریێ روو نەدەن.
