نەتەوەیێن ئێکگرتی: هاریکاریێن پێدڤی ناگەهنە خەلکێ غەزە
رێکخستنا مافێن مرۆڤی یا سەر ب نەتەوەیێن ئێکگرتی راگەهاند کو ژ بەر ئێرشێن بەردەوام یێن ئسرائیلێ هاریکاریێن پێدڤی ب تایبەتی ژی خوارن و دەرمان ناگەهنە دەستێ خەلکێ سڤیل و مەترسی ل سەر ژیانا وەلاتیێن سڤیل ل غەزە بەردەوام دکەت، دڤێت بەری هەر تشتەکێ شەڕێ نها ل غەزە بهێتە راگرتن دا ئەو بشێن پتر هاریکاریا خەلکی بکەن.
هەمان رێکخستنێ ئەو یەک ژی دیار کریە کو ژ بەر شەڕی هەتا نها گەلەک وەلاتیێن سڤیل بووینە قوربانی، بەردەوامیا شەڕی ژی دێ بیتە ئەگەر هژمارا قوربانیان زێدەتر لێ بهێت، نها گەلەک گرنگە شەڕ بهێتە راگرتن.
ل ئالیێ دی سەرۆک وەزیرێن ئسرائیلێ ژی راگەهاند هەتا ئەو نەگەهنە ئارمانجێن خوە دێ شەڕێ ل دژی حەماسێ بەردەوام بیت و وەکو ئسرائیل ئەو نها کار دکەن دا بشێن مەترسیا حزبوللا لوبنانێ ژی ل سەر وەلاتێ خوە کێم بکەن، ژ بۆ ڤێ یەکێ ژی لەشکرێ ئسرائیلێ د ئامادەباشیەکا تەمام دایە.
