نەخوشیێن هەناسێ دناڤ زارۆكان دا بەلاڤبووینە
رێڤەبەرێ نەخۆشخانا هیڤی یا زارۆكان ل دهۆكێ دیاركركو د زڤستانا ئەڤ سالە دا رێژا نەخۆشیان ل دەڤ زارۆیان گەلەك زێدەبووینە و پتریا وان ڤایرۆسێ كۆخك وپەرسیڤ وسینگ كولبوون هەیە و ل نەخۆشخانا هیڤی یا زارۆیان 200 تەخت هەنە و هەموو پر دبن و هەتا 300 نەخۆشان ژی دهێنە نڤاندن.
د. نزار بەكر، رێڤەبەرێ نەخۆشخانا هیڤی یا زارۆكان دیاركر، ئەڤە رێژەكا زۆر یا مەزنە و ئەو زارۆكێن ئەم ژێ د ترسین دەمێ تووشی ڤایرۆسێ كوخك وپەرسیڤ وسینگ كولبوونێ دبن، ئەو زارۆكن یێن بەروەخت ژدایك دبن یان زارۆكێن رەبوو هەی ب تایبەتی ژی ئەو زارۆكێن ل ژێر ژیێ ئێك سالیێ دا، دەمێ تووشی ڤێ نەخۆشیێ دبن چارەسەری گەلەك یا ب ساناهی نینە و گەلەك جاران دەرمان فایدە ناكەن بۆ چارەسەریا زارۆكی، هەكە بێهنا وی تەنگ ببیت وزارۆك تشتەكی نەخۆت ل نەخۆشخانی دهێتە نڤاندن.
رێڤەبەرێ نەخۆشخانا هیڤی یا زارۆكان ئاشكەرا كركو ئەڤ سالە رێژا نڤاندنا زارۆكێن نەخۆش گەلەك زێدەبوویە و بەهرا پتر ژ رۆژان نەخۆشخانە یا تژی یە ژ نەخۆشان و وان جهێ 200 نەخۆشان هەیە لێ 300 نەخۆش ژی دهێنە نڤاندن دناڤ نەخۆشخانێ دا و گۆت: دەمێ ئەڤ رێژە وەسا بلنددبیت بێگومان كارتێكرن ل پێشكێشكرنا خزمەتێن ساخلەمیێ ژی هێتە كرن.
د. نزار بەكر، ئاماژە دا وی چەندێ ژی كو دبیت ئەو زارۆكێ دناڤ نەخۆشخانێ دا چارەسەریێ وەردگریت تووشی دلرابوون و زكچوونێ و هندەك ئێشێن دیترژی ببیت، لەورا خۆپاراستن گەلەك باشترە و پێدڤیە دایك وباب دڤی وەرزێ سالێ دا چاڤدێریا ساخلەمیا زارۆكێ خوە بكەن، داكو یێ پاراستی بیت.
