نەخوشیەک تووشی کونجیێن دێرەلووکێ بوویە
ئەڤرۆ نیوز، نەوزاد ھلۆری:
ل سنوورێ ناحیا دێرەلووکێ ھژمارەکا زورا کونجیان ھاتینە چاندن، بەلێ جورە نەخوشیەکێ کارتێکرن ل بەرھەمێ کونجیان کریە، شیرەتکارەکێ چاندنێ ل دێرەلووکێ دیارکر کو پێدڤی یە ب زوترین دەم جوتیار چارەسەریا کونجیێن خوە بکەن ئەگەر دێ بەرھەمێ وان ژ دەست چیت و کارتێکرن لسەر ھێتەکرن.
ستار خورشید، شیرەتکارێ چاندنێ ل بنگەھێ شیرەتکاریا چاندنێ ل دێرەلووک بو ئەڤرۆ نیوز گۆت: (ماوەیەکە جوتیار گازندا وێ یەکێ دکەن کو نەخوشیەک دناڤ کونجیێن وان پەیدابویە، پشتی کو مە ژ نێزیک سەرەدانا ھندەک ژ زەڤێن چاندنا کونجیان ل چەمێ گوندێ گەلەکا کری، دیاربو کو نەخوشی ژ جورێ کەرویە ئانکو فتریات، کارتێکرنەکا زۆر لسەر بەرھەمێ کونجیێ دکەت ئەگەر نەھێتە چارەسەرکرن).
زێدەتر گۆت: (پێدڤی یە جوتیار دەرمانێ بروپلانت و توبسن تێکەلی ھەڤ بکەت و وەکو چارەسەری بو کوشتنا نەخوشیا کەروی لسەر کونجیان، ئەو ژی 40ملم پروبلانت 16ملم توبسین بو 16 لیترێن ئاڤێ، دڤێت ل دەمێ ئێڤاریان ژی بھێتە رەوشاندن، رەشاندن ژی لسەر ئاخێ بیت).
ناڤبری دیارکر ژی کو نابیت جوتیار کونجیێن خوە ل دەما گەرمێ ئاڤ بدەت و زێدەتر گوت: (پرانیا جاران ئەڤ نەخوشیە ل گەرمێ دروست دبیت، دبیتە ئەگەرێ ھندێ کو کونجی ژ وەرارێ راوستیت، نوکە ل سنوورێ ناحیا دێرەلووک دناڤبەرا 500 بو 600 دونەمێن عەردی ب کونجیان ھاتینە چاندن و سالانە بەھەمەکێ باش دھێت، لەورا گرنگە جوتیار زێدەتر خەمێ ژ بەرھەمێ خوە بخوت).