نەخوەشخانەیەكا نوو ل زاخۆ هاتە ڤەكرن
زاخۆ، دلۆڤان هالۆ:
ل ژێر چاڤدێرییا گوهدار شێخۆ، سەرپەرشتێ ئیدارەیا سەربخوە یا زاخۆ، دوهی 8/12/2025 نەخوەشخانەیا زاخۆ یا تایبەت ل دەشتمرێ هاتە ڤەكرن و كەفتە د خزمەتا خەلكێ سنۆرێ ئیدارەیا سەربخوە یا زاخۆ دا.
سەرپەرشتێ ئیدارەیا سەربخوە یا زاخۆ د گۆتارەكێ دا گۆت: «سوپاسیا هەموو وەبەرهێنەرێن دەڤەرێ دكەین، ژ بۆ وێ جورئەت و باوەرییا ل دەف وان پەیدابووی ژ بۆ پێشئێخستنا كەرتێ تایبەت و كاركرن د بیاڤێن خزمەتكرنێن جودا دا ل دەڤەرێ، سوپاس بۆ وەبەرهێنەرێن نەخوەشخانا زاخۆ یا تایبەت، كو شیاین كارەكێ جوان و ب ڕێكوپێك ئەنجام بدەن و داخوازا ساخی و سلامەتیێ بۆ هەموو كەسەكی دخوازین».
گوهدار شێخۆ گۆتژی: «ب پشتەڤانییا مەسرور بارزانی، سەرۆكێ حكومەتا هەرێما كوردستانێ، هەموو كەرت ل زاخۆ د پێشڤەبرن و گەشەكرنێ دانە، مە گرنگییەكا تایبەت و مەزن دایە كەرتێ ساخلەمیێ ل دەڤەرێ».
