نەخوەشخانەیەكا 40 تەختی ل دەڤەرداریا باتیفا دهێتە ئاڤاكرن

زاخۆ، دلۆڤان هالۆ:

فەرهاد مەحموود، دەڤەردارێ باتیفا بۆ ڕۆژناما ئەڤرۆ دیاركر كو نەخوەشخانەیەكا سێ نهۆمی یا سەردەم و پێشكەفتی ل دەڤەرداریا باتیفا دهێتە دروستكرن و دبێژیت: بەری نوكە ب تنێ دو بنگەهێن ساخلەمیێ هەبوون، ئێك ل باتیفا و ئێك ل ناوچەداریا بێگۆڤا.
دەڤەردارێ باتیفا ئاماژە ب وێ چەندێ ژی كر كو ئەڤ نەخوەشخانە یا 40 تەختیە و ژ چەندین پشكان پێك دهێت، وەكو: پشكا تیشك و سۆنەر و هەوارهاتن و تاقیگەهـ و ژ دایكبوون، زێدەباری سێ هۆلێن نشتەرگەریان و چەندین پشكێن دی.
فەرهاد گۆت: «ئەڤ نەخوەشخانە د قووناغێن دووماهیێ یێن بجهئینانێ دایە، رەنگە ل دووماهیا ئەڤ سالە بكەڤیتە د خزمەتا وەلاتیێن سنۆرێ دەڤەرداریا باتیفا دا، دیسا دێ ئەڤ نەخوەشخانە خزمەتا دەڤەرێن بەرواری و دوسكیان ژی كەت، چونكی باتیفا بۆ وان ژ دهۆكێ‌ و زاخۆ نێزیكترە».

کۆمێنتا تە