«نەخوەشە د عەشقێ دا مەعشوق دەستهەلاتدارا زالم بیت»
سەلاح سندی – زاخۆ
شاه و سولتانا دلێ من
سیبەر و تاجا سەرێ من
ئەڤین و شێتبوونا من
پارێزەرا من، تو بەرگریێ ژ مافێ مرۆڤا دكی!
بێژە..
بێژە من بۆچی من داخوازی دادگەها دكی؟
ئەز ب خودێ ئەز نە گونەهكارم
نە گەندەلكارم
ئەز دزانم ئەگەر چییە.
چونكی من ئەڤینی كریە
ئەگەر یاسایا دادگەها تە ئەڤینیێ دەینیت تاوان،
مەزنترین گونەهبارم ئەزم
چونكی من دلێ تە یێ دزی بۆ خوە یێ بری
ڤێجا ئەو یاسا و دادگەها تو پێ دخوری
دگەل دادوەری و داواكارێ گشتی
من پارێزەرێ بەڕەڤانیێ ژی پێ نەڤێت
ئەگەر تو ب خوە ژی ل دەورێ دادوەری ژی بی
تو ب دەستێ خوە ئیمزا بكی بریارا سێدارا من
سەد جار بدی
ئەز هەر دلێ تە بەر نادم
دێ جانێ خوە ل سەر تە دم
پارێزەرا من تە گوهـ ل تاوانبارێ دزیا دلێ خوە بوو؟
تو سەركردا دەولەتبوونا ئەڤینا منی
تو ڕێبەرا ڕێكا ژیانا منی
هەر توی هوستایا كەلها عەشق و ئەڤینا من
من ڕەوشتێ ڕەوشەنبیریێ
یێ ژ ڕەفتارێن تە یێن نازك گرتی
زانینا من ژی یا تەیە
هۆزانێن منن
بەس تو پەیڤا دئینی
ڤێجا چاوا
من داخواز دكی دادگەهێ
تە نە گرتم نە بەردام
تە نە هێلام تە نە ڤیام
نە ئازاد كرم نە زیندان
تە كرم گونەهبارەكێ بێ ئەگەر و بەرسڤ
چاڤ هشیار و دل دگەل مریان!
