نەخۆشخانەیا پەنجەشێرێ و سەنتەرێ گولچیسكان ئەڤرۆ دێ هێنە ڤەكرن
دهۆك، لەزگین جۆقی:
رێڤەبەریا گشتی یا ساخلەمیا پارێزگەها دهۆكێ ئاشكرا كر، ب چاڤدێریا پارێزگارێ دهۆكێ و ب ئامادەبوونا وەزیرێ ساخلەمیا حكومەتا هەرێما كوردستانێ، بڕیارە ئەڤرۆ 13/5/2025 نەخۆشخانەیا پەنجەشێرێ و سەنتەرێ چارەسەری و چاندنا گۆلچیسكان ل پارێزگەها دهۆكێ بهێنە ڤەكرن.
مەتین جەمیل، بەرپرسێ راگەهاندنا رێڤەبەریا گشتی یا ساخلەمیا پارێزگەها دهۆكێ بۆ ئەڤرۆ گۆت: «ل ژێر چاڤدێریا د. عەلی تەتەر، پارێزگارێ دهۆكێ و د. سامان بەرزنجی، وەزیرێ ساخلەمیا حكومەتا هەرێما كوردستانێ نەخۆشخانەیا ئومێد یا نەخۆشێن پەنجەشێرێ یا 160 تەختی، هەروەسا سەنتەرێ چارەسەری و چاندنا گۆلچیسكان یێ 60 تەختی دێ هێنە ڤەكرن، ئەڤ هەردو پڕۆژەیێن ساخلەمیێ دێ كەڤنە د خزمەتا نەخۆشان دا».
ناڤهاتی گۆتژی: «نەخۆشخانەیا ئومێد یا پەنجەشێرێ ب ئامادەبوونا قونسلێ ئیتالیا و رێكخراوا ئایسپۆ و رێكخراوا وهۆ ب گوژمێ ملیۆنەك و 75 هزار دۆلاران دێ هێتە ڤەكرن و سەنتەرێ چارەسەری و چاندنا گۆلچیسكان ژی دێ هێتە ڤەكرن».
