نەخۆشیێن دلی پتر ژ نەخۆشیێن پەنجەشێرێ ژنان دكوژن
بەرپەرێ ساخلەمیێ:
تشتێ بەرچاڤ ئەوە كو نەخوشیێن دلی سالانە پتر ژ نەخوشیێن پەنجەشێرێ ژنان دكوژن، یا ژڤێ بەرعاقلتر ئەوە كو ئاریشەیێن دلی نوكە گەلەك ب سانەهی كەتینە، ئەڤە نووترین رێكن كو ژ ئەنجامێ ڤەكولینان دەرچووین سەبارەت چاڤدانا ساخلەمیا دلی:
* شیری ڤەخوو:
ڤەكولینەكا نوو كو ب چاڤدێریا پەیمانگەها نیشتمانی یا دلی و سەهان و خوینێ هاتبوو ئەنجامدان دیاركریە كو ئەو كەسێن گەلەك روینێ تویر دخون وەكو شیری و نیڤشكی و پەنیری ئەو پتر تووشی نەخوشیێن فشارا خوینێ دبن و فشارا خوینێ یا بلند ژی دبیتە ئەگەرێ پووچكرنا دەمارێن خوینێ و تووشبونێ ب ئێشێن دلی و ژانەیا دلی، ڤەكولەر دبێژن ئەو بەرهەمێن سپیاتی یێن كێم روین دناڤدا هەین گەلەك باشە بۆ پاراستنا مرۆڤی ژ نەخوشیێن دلی.
* هندەك لڤینێن نوو ب جەربینە:
30 خولەك رۆژانە ژ وەرزشا (تای شوو) كو جورەكێ نوو یێ وەرزشا چینی یە و پێكهاتیە ژ گەلەك لڤینێن هێدی و ئارام دێ شیان هەبن كو فشارا خوینێ كێم بكەت، د ڤەكولینەكا نوو دا هاتە دیاركرن كو ئەو كەسێن بۆ دەمێ سالەكێ ڤان جورە راهێنانان دكەن فشارا وان یا خوینێ گەلەك هاتە خوارێ.
* هنار:
وەسان دیارە كو شەربەتا سروشتی یا هناران رەقبوونا خوینگێران كێم دكەت و د هندەك دەلیڤەیان دا خوینگێران دپارێزیت ژی، ڤەكولینەكا نوو كو ل ئەكادیمیا نیشتمانی یا زانستی هاتبوو ئەنجامدان دیاركریە كو شەربەتا سروشتی یا هناران دبیتە ئەگەرێ كێمكرنا كومڤەبوونا كولیسترولی ب رێژا 30%، ئەڤ ڤەكولینە ل سالا 2006ێ هاتبوو كرن و دیاركریە كو هنار ب گەلەك رێكان وەكو چارەسەری و خوپاراستن دهێتە ب كارئینان.
* ژدل بكە كەنی:
ل ڤەكولینەكا كو ل قوتابخانا پزیشكی یا زانكویا میریلاند هاتیە ئەنجام دان دیاردبیت ئەوێن كو ژیانا خۆ ل بەر فلمێن كومیدی دا دبورینن، خولا وان یا خویناوی زویكا و ب سانەهی دهێتە گوهارتن و ڤەكولینێ دیاركر كو هەر چ نەبیت پێدڤیە مرۆڤ رۆژانە چارێكەكێ بكەتە كەنی.
* خۆ ژ خەوێ دوور نەكەن:
ئەو ژنێن رۆژانە كێمتر ژ پێنج دەمژمێران دنڤن ئەو ب رێژا 30% و پێهەلتر ژ وان ژنێن بۆ دەمێ هەشت دەمژمێران دنڤن تووشی ئاریشە و نەخوشیێن دلی دبن، كێم نڤستن ئاریشەیێن مەزن د هورمونان و فشارا خوینێ و رێژا شەكرا دناڤ خوینێ دا پەیدادكەت، لەورا ئەگەر تە چارێكەكێ كرە كەنی و ب دووماهی هاتی باشترە قەستا نڤستنەكا كوور بكەی.
