نەخۆشێن گولچیسکان و ڕۆژیگرتن
ل هەیڤا رەمەزانا پیرۆز، گەلەک ژ نهخۆشێن گولچیسكان پرسیارا هندێ دکەن کا ئەرێ دشێن رۆژییێ بگرن یان نە؟ دکتۆر شاکر سەلیم بالندی، تایبەتمەندێ نهخۆشی و نشتهرگهری و چاندنا گولچیسکان ل پارێزگهها دهۆکێ، کۆمەکا رێنمایێن گرنگ و چارەنڤیسساز بۆ ڤان نهخۆشان رادگەهینیت.
کێ بۆ هەیە رۆژییێ بگریت؟
دکتۆر شاکر دیار دکەت کو رەوشا نهخۆشان ل دویڤ جۆرێ نهخۆشیێ دهێتە گوهۆڕین:
* ئەوێن گولچیسک بۆ هاتینە چاندن: ئەڤ کەسە پێدڤی ب ڤەخوارنا ئاڤێ و خوارنا دەرمانان نە ب شێوەیەکێ بەردەوام، لەورا باشترە رۆژییێ نەگرن دا کو کاریگەرییا خراب ل سەر گولچیسکا چاندنی نەبیت.
* خودانێن ئێک گولچیسک: ئەو کەسێن تنێ ئێک گولچیسک هەین و ب دروستی کار دکەت، چو ئاریشە نینن و دشێن ب شێوەیەکێ سروشتی رۆژییا خۆ بگرن.
* لاوازییا گولچیسکان (پلا 1 و 2): ئەڤ کەسە دشێن رۆژییێ بگرن، بەلێ ب مەرجەکی؛ پشتی 7 تا 15 رۆژان ژ رۆژیگرتنێ پێدڤییە پشکنینێن خوینێ بکەن دا پشتراست بن کو چو فشار نەکەفتییە سەر گولچیسکێن وان.
ئاگەهدارییەکا تۆند بۆ پلا 3 و 4
د.شاکر سلیم بالندی، تایبەتمەندێ نهخۆشیێن گۆلچیسکان ئاماژێ ب هندێ دکەت کو ئەو نهخۆشێن د قۆناغێن سێ و چار یێن لاوازییا گولچیسکان دانە، نابیت ب چو رەنگان رۆژییێ بگرن، چونکە نەمان یان کێمبوونا ئاڤێ د لەشی دا دێ وان بەرەف “شووشتنا گولچیسکان” Dyalisis بەت.
رێنمایێن گشتی بۆ پاراستنا ساخلەمیێ
بۆ هەمی نهخۆشێن دی یێن کو رۆژییێ دگرن، دکتۆر شاکر چەند خالەکێن سەرەکی پێشنیار دکەت:
* ڤەخوارنا ئاڤێ: پێدڤییە دناڤبەرا فتارێ و پاشیڤێ دا ب کێمی 2 تا 3 لیترێن ئاڤێ بهێنە ڤەخوارن.
* خوارنا ساخلەم: دویرکەفتن ژ خوێ، شەکر، و خوارنێن قوتیکری (معلبات).
* کۆنترۆلکرنا نهخۆشیێن دی: ئەو کەسێن فشارا خوینێ، شەکرێ یان جەلتە هەین، پێدڤییە دناڤبەرا فتار و پاشێڤێ دا دەرمانێن خۆ ب رێکوپێکی بخۆن دا کو مهترسی ل سەر گولچیسکان دروست نهبیت.
