نەخۆش ژ دەرڤە بۆ وەرگرتنا چارەسەریێ قستا نەخۆشخانەیێن هەرێمێ دكەن
ئەڤرۆ
وەلاتیێن بیانی و ئیراقێ بۆ وەرگرتنا چارەسەریێن نۆشداری دهێنە هەرێما كوردستانێ و ب تنێ د سالا بۆری دا 150 هزار نەخۆشان سەرەدانا نەخۆشخانەیێن هەرێما كوردستانێ كرییە.
وەزارەتا ساخلەمیا حوكمەتا هەرێما كوردستانێ راگەهاند، د سالا بۆری دا نێزیكی 150 هزار وەلاتیێن بیانی و ناڤەراست و باشوورێ ئیراقێ سەرەدانا نەخۆشخانەیێن تایبەتێن هەرێما كوردستانێ كرییە.
د. ئەژین ئیسماعیل، رێڤەبەرێ دەزگەهێن ساخلەمی یێن تایبەت دیار كر، ل هەرێما كوردستانێ نێزیكی 58 نەخۆشخانەیێن تایبەت پێشوازیێ ل نەخۆشێن ناڤخوە و بیانی دكەن و چار نەخۆشخانەیێن دی ژی د قووناغا ئاڤاكرنێ دانە و گۆت: «د سالێن بۆری دا خەلكێ هەرێما كوردستانێ بۆ وەرگرتنا چارەسەریێ دچوونە ژ دەرڤەی وەلاتی، لێ نوكە وەلاتی ژ دەرڤەی هەرێمێ بۆ وەرگرتنا چارەسەریێن نۆشداری سەرەدانا هەرێما كوردستانێ دكەن».
