نەزانینا سێکسی کارتێکرنێ ل خۆشی و ساخلەمیا ھەڤژینان دکەت
ئەڤرۆ نیوز:
رەڤین ژ شارەزایا کریارا سێکسی دناڤ جڤاکێ مەدا ب ئاوایەکێ زور و ب شەرم ھاتیە زانین بێ کو گرنگی یا ڤی بابەتی بزانین، لەورا ب دروستی مافێ خوە وەرنەگرتیە دکتورەک ژی دبێژیت: نەزانینا کریارا سێکسی ب شێوەیەکێ زانستی کارتێکرن ل سەر خوشی و ساخلەمیا ھەڤژینان ھەیە و دبیتە سەدەما کومەکا ئاریشەیان بۆ خەلکی و پێدڤیە پتر گرنگی ب بابەتێن سێکسی بھێتە دان.
د. ئاشتی عەبدولحەکیم، د ڤێ دەربارێ دا بو رۆژناما ئەڤرۆ گۆت: رەوشەنبیریا سێکسی بابەتەکێ ئێکجار گرنگە د ژیانا مە مروڤان دا، بەلێ مخابن دناڤ جڤاکێ مە دا ڤی بابەتی مافێ خوە یێ دروست وەرنەگرتیە و ئەو پووتەیێ پێدڤی پێ نەھاتیە دان، ژبەر ھەستیاریا بابەتی کو پتریا مە وەک بابەتەک شەرمێ ل قەلەم ددەین، ئەڤەژی دبیتە سەدەما کومەکا ئارێشەیان بو خەلکێ مە و مروڤان ب گشتی و گۆت: داکو مرۆڤ خوشترین تام ژ کریارا سێکسی ببینیت، گرنگە ب سەر رێکێن ئازراندنا سێکسی ھەلببیت و وێ کریارێ دەست پێ بکەت ب یاریک و دەستڤەدانا جھێن ھەستیار د لەشی دا ژلایێ سێکسی ڤە بەری ب تمامیا کریارا سێکسی رابیت. گۆتژی: پتریا ھەڤژینان د جڤاکێ مە دا زەلام یێ ئەزئەزوکە (انانی) و ب تنێ ل خوشیا خوە دگەڕیت و ھەولەکا دروست نادەت خوشیا ژنێ بن پێ نەکەت، لەوما گەلەک ژ ڤان ژنان تووشی ساربوونا سێکسی دبن یانژی چاڤەدەر دبن و ل ھەڤبەندیەکا دی دگەڕِن دوور ژ چارچوڤێ خێزانێ و نەدوورە بھێنە ب ژێکڤەبوونێ ب دووماھی بھێن.
د.ئاشتی عەبدولحەکیم، ئەوژی دیارکر دەما ھەردو رەگەزان رەوشەنبیریەکا باش ھەبیت ل بوارێ ھەڤبەندی و تێکەلیا سێکسی دێ رێکێن ئازراندنا سێکسی زانن و سەرەدەریا وان دگەل ھەڤدو دێ یا راست و دروست بیت، لێ ھەکە سەرەدەریا زەلامی دگەل ژنێ یان بەروڤاژی سەرەدەریا ژنێ دگەل زەلامی یا راست و دروست نەبیت ژلایێ تێکەلیا سێکسی ڤە تێربوونا سێکسی ژی نابیت و دئەنجام دا دێ لایەک یان ھەردو لا کول و کوڤانێن خوە بێ دەنگ داعویرن و مینن برسی ھەموو ژیانا خوە، یانژی دێ لایەک یان ھەردو لا بەرێ وان کەڤیتە ژدەرڤە و نەدوورە ھەڤبەندیەکێ یان پتر دگەل ئێکێ ژ رەگەزێ دی گرێدەن. ئەڤە ژی دناڤ جڤاکێ مە دا حەرامە ژلایێ ئایینی ڤە و قەدەغەیە ژلایێ جڤاکی و یاسایی ڤە و مالوێرانی و مال کەمباخبوون ژێ ئەنجام پەیدادبن و خودان نەخاسم ژن، فھێت و روو رەش و شەرمزار دبیت.
ئاماژە دا وێ چەندێ ژی کو ئەم بسولمان ب دروستی د ئایینێ خوە نەگەھشتینە و گوتگوتک و ھزرێن شاش و لەنگ تژی سەرێ مە ھەمیانە، ئەو ئایینێ رەوشەنبیریا ل ھەر بوارەکی، و ئێک ژ وان بوارێ سێکسی، ب گونەە ل قەلەم بدەت ئەو نە ئایینە، مروڤێ نەزان و بێ رەوشەنبیری نەبەرئەقلە یێ زانا و رەوشەنبیر بیت د ئایینێ خو دا، ھەمی شێخ و مەلا ھەر ژ کەڤندا یا خوە ل دەریا رەوشەنبیریا سێکسی دای ل دووڤ زانینا خوە و ھەر تشتێ پێدڤی روھنکرن و ئاشکراکرنێ ل بوارێ پێزانینێن سێکسی گەھاندینە خەلکی بێ کو ئەڤ چەندە ب گونەە یان شەرم زانیبیت، حەز و ڤیانێن سێکسی خودای دناڤ مە دا چاندینە نە مروڤان، لەوما راوەستیان ل سەر ئەو پێزانینێن پێدڤی بو ھەر کەسی ژبو پاراستن و سەرئێخستنا ژیانا خو یا سێکسی کارەک پیروزە و نە شەرمە.
د.ئاشتی گۆت ژی داکو رەوشەنبیریا سێکسی ل سەر بنیاتەکێ زانستی دناڤ جڤاکێ مە دا بەلاڤ ببیت دڤێت خێزان و قوتابخانە شەرمێ ژ ڤی بابەتی نەکەن و دایک و باب و ماموستا ژێ نەرەڤن، ھەکە نە دێ کور و کچێن مە پێزانینێن لەنگ و شاش ژ کولانێ وەرگرن و دئەنجام دا سەدان دەردەسەری و ئاتاف دێ ھەڤرویشی مە بن، زێدەباری ڤێ چەندێ دڤێت دەزگەھێن راگەھاندنێ خوە ل ڤی بابەتی بکەنە خودان و ژێ نەرەڤن.
