نەشێم هەموو دەما بەرهەمان بەلاڤ بکەم
کاوین جیھاد تەحلاڤی:
ئەز و تو وار ھەتا کەنگی ژ دووری ھەڤبین ب ڤی رەنگی پر درێژ بوو چیرۆکا مە وەرە جانم بوو درەنگی ب ڤان پەیڤان ھونەرمەندا ناڤدارا کورد، نارین فەقە بەحس ل بەرھەمێ خوە یێ نوو کر و دیارکر ھەر چەندە کارێن وێ یێن ھونەری یێن نوو ھەبوون، لێ ژ بەر رەوشا کورد تێدا دبوورن وێ ھندەک ژ کارێن خوە یێن ھونەری بەلاڤ نەکربوون.
نارین فەرقە دبێژیت: کو ئەو بەرھەمێ نوکە من بەلاڤ کری یێ ب ناڤێ «دووری» ئێک ژ کارێن من یێن گەلەک سەرنجراکێشە بۆ من ژ بەر کو چیرۆکا وێ بۆ من گەلەک یا سەرنجراکێشە کو پەیڤێن وێ سترانێ ژ ئالیێ مامۆستا، ئەدیب چەلکیڤە ھاتینە نڤیسان و ھەر دیسان ئاوازا وێ ژ ئالیێ ھونەرمەند، ھاروون ئەلکیڤە ھاتیە دانان و سینان بووزو کارێ ریکۆردا وێ کریە.
ھونەرمەندا ناڤھاتی ئاماژە ب وێ چەندێ ژی کر کو راستە ئەم دووری وەلاتێ خوەینە لێ د کار و بەرھەمێن خوە دا ھەر چ تشتەکێ گرێدایی چاند و کەلتوورێ کوردی بیت وەکو مۆزیک و وەکو دیمەن ژی ئەم خوە ژێ بێبەھر ناکەین، بۆ نموونە د کلیپا من دا ھەر چەندە ل وەلاتێ سویدێ من وێنەکریە لێ مە چیا و جھێن کەڤنار و جلۆبەرگێن کوردی ھەلبژارتینە و ھندەک جھێن دیرۆکی د کلیپێ دا دیار دبن کو بازارەکە دیرۆکا وێ بۆ پتر ژ 1400 سالان دبووریت.
نارینێ ئاشکرا ژی کر کو گەلەک بەرھەمێن نوو من ھەنە، لێ ھندەک جاران رەوشا کوردان ب گشتی وێ رێکێ نادەت کو ھەر دەما مە دڤێت بەرھەمان بەلاڤ بکەین، تایبەت رەوشا ڤێ دووماھیێ یا رۆژھەلاتێ کوردستانێ و دیسان یا رۆژئاڤا، گرنگە ئەم ژی خوە دگەل خوەشی و نەخوەشیێن گەلێ خوە ب گۆنجینین و ھیڤیا من یا سەرەکی ئەوە ب ھونەرێ خوە ب خوەشی و نەخوەشی دگەل گەلێ خوەبم.
ھونەرمەند نارین فەقە کو ل وەلاتێ سویدێ دژیت دیارکر ژی کو ھێشتا دیار نینە کا بۆ ئاھەنگ و کۆنسێرتێن سەرێ سالێ دێ ل کیڤە بیت، بەلێ گۆت ئەڤ بەرھەمێ من بلا دیاریا من یا سالا نوو بیت بۆ گەلێ من ل ھەر جھەکی.
