نەوزاد عەلی: سه‌ركه‌فتنا ڤێ دووماهیێ گه‌له‌ك گوهۆڕین په‌یداكرن
عەلی حاجی :
د داخویانیەکێ دا هاریکارێ ڕاهێنەرێ تیما زاخۆ ئەوا پشکدار د خولا نایابا کوردستانێ یا تەپاپێی دا بۆ رۆژنامه‌یا ئەڤرۆ دیار کر سەرکەڤتنا تیما وان بەرامبەر سوران گەلەک تشت گۆهارتن و ئەو هزر د جاما کوردستانێ دا دکەن.
زێدەتر نەوزاد عەلی گۆت: گوهورینا ڕاهێنەری هندەک گوهۆرین دناڤ تیمێ دا پەیدا کرن ب تایبەتی ژی ژ روویێ دەرونی ڤە یاریزان باشتر بوون و شیان خوە زێدەتر دگەل تیمێ و پلانێن ڕاهێنەری بگونجینن، سەرکەڤتنا وان بەرامبەر سوران دناڤ یاریگەها مە دا گەلەک تشت گوهورین کو ژ وان ژی ب فەرمی ئەم ژ دابەزینێ رزگار بوین و هەر پێنچ یاریێن بهێت دا خوسارەت ژی ببینن تیما مە داناکەڤیتە خولا پلە ئێک ژبەر هندێ نوکە دا گڤاشتن سەر تیما مە نەمان و ئێدی دێ کار کەین خوە پتر نێزیکی رێزبەندیێ بکەین و ئەو پێنچ یاریێن مایی ژی دێ وەکو یاریا دووماهیێ سەرەدەریێ دگەل دا کەین دا کو بشێن زورترین خالان ب دەست خوەڤە بینن و یاریزانێن مە د گەنجن و ئەڤە ژی بەرهەمێ وێ کارکرنا بەردەوامە یا کو شیاین ڤان یاریزانێن کورێن زاخۆ دروست بکەن و سالێن بوری دا ب یاریزانێن بیانی مە پشکداری د خولێ دا د کر و ب زوری مە مانا خوە د خولێ دا د پاراست بەلێ نوکە دا ئەم ب کورێ زاخۆ یێ یاریێ دکەین و ئەم ژ تیمێن هەڤرکین د خولێ دا و دێ هەمی شیانان مەزێخین و هەتا دوماهی چرکە ژئ دێ شەری بۆ ناسناڤی کەین.
زێدەتر گۆت ژی: پشتی سەرکەڤتنا مە ل سەر سوران د خولێ دا ئەم نوکە دا هزر بۆ یاریا جاما کوردستانێ دکەین بەرامبەر دهوکێ و ئەو یاری دێ د یاریگەها مە دا بیت و مە پلانەکا باش داناتیە کو ب چ رەنگێ هەبیت پێدڤیە جاما کوردستانێ ب دەست خوەڤە بینن ژبەرکو یاریا دوماهیێ د یاریگەها مە دایە و نابیت وێ دەلیڤەیا گرنگ ژ دەست بدەین و دێ ب هەمی هێز ڤە یاریێ د جاما کوردستانێ دا کەین.
