نەژبیر و ژبیر
ئارین عیسا عەبدلڕەحمان
سپێدەهییا چڕییا دویێ یە، ئەسمانی کراسەکێ مژەوی یێ ل بەر خوەکری، دەنگێ کۆچکرنا بالندەیان ل ئەسمانی دەنگڤەددەن، هەر وەکی خاترا خوە ژ هەر ئادەمیزادەکی دخوازن. ئەو خوشک و برایێن ل دویماهییا کۆلانا مە ل شوینا وەکی هەمی زارۆکێن دی بەرەڤ قوتابخانەیێ چووبان، عەرەبانەیا خوە یا کاری دبرنە جاددەیا گشتی، ئەو جهێ ئەز ل هیڤیا پاسێ دا بچمە کاری. ژ هێزا ئەوی کوڕێ دەهـ بوهار مەندەهۆش دمام، قنینێ غازێ ب دەستەکی و ب دەستەکێ دی هاری خوشکا خوە عەرەبانە پالددا.
ـ سپێدەبـــاش خۆشکا ئەژین، کا سیهوانەیا تە؟ دبێژن ئەڤرۆ دێ باران باریت، بەرێخوەبدێ عەرەبانەیا مەژی یا ڕاکری، بابێ من گۆتبوو: دەمێ باران بهێت دێ زڤڕمە مال، توژی نابینی ئەڤرۆ چەندا جوان و پیرۆزە!
نەژبیری گۆت و بێی کو ل هیڤیا بەرسڤا من بیت، گڕنژینەکا بچویک ل سەر دێمێ ئەوان فریشتەیێن بچویک دیاربوو، پاش ئەو و ژبیر دناڤ مژێدا بەرزەبوون.
خەلکێ کۆلانێ دگۆت: بەری پێنچ سالان بابێ ئەوان د شەریدا کەڤتبوو دەستێ دۆژمنان و ل دەڤ خوە زیندان کرینە، ژ ئەوێ ڕۆژێ وەرە چ دەنگوباس ژێ گوهلێنەبووینە، لێ جاران هندەک نامە ژ دەڤ بابێ ئەوان دهێت، کو سۆز یا دایە ئەوان دێ زڤڕیتەڤە، لێ ب مەرجەکی گوهێ ئەوان ل دەیکا ئەوان بیت و دلێ ئەوێ نەهێلن.
دەما گەهشتیمە سەر جاددەیێ، بێهنا تۆڤکێن قەلاندی و دویکێلا باقلان عەرەبانەیا ئەوان گەرمکربوو. دلۆپێن بارانێ مینا ڕۆندکان ب سەر سیهوانەیا عەرەبانێدا دهاتنە خوار، من دەستێ خوە ب مەرەما سڵاڤێ بۆ ئەوان ڕاکر و بەرەڤ کاریڤە چووم.
پشتی ژ کاری دزڤڕیم، هەر ل هەمان جهـ دهاتمە خوار. من دیت ئەڤرۆ زویتر یێن چووینە مال، من هزرکر ئاخڤتنا نەژبیری ڕاست دەرکەڤت، دلێ من بەری پێنگاڤێن من ڕاکر و من قەستا مال کر دا ب چاڤێن خوە ببینم کا ئەو زارۆک د چ خوەشی دانە، دەما دناڤ غەریبییا هەمبێزا بابێ خوەدا بەرزەدبن.
دەما گەهشتیمە مال، من دیت چادرەکا مەزن ل کۆلانێ ڤەداییە و خەلک هەمی یێن کۆمبووین، من ژ چاڤێن خوە باوەرنەکر، تابویتەک ژ مالا نەژبیری دەرکەڤت و ژبیر و نەژبیر ب هەوار و قیژییان یێ ب دویڤ دکنە غار و دبێژن، بابێ مە نەبن، ئەڤە چەند ڕۆژە ئەم ل هیڤییێ، گوهێ مە باش یێ ل دەیکا مە، لەوڕا ئەوێ هاتی دا سۆزا خوە بجهبینیت.
