نەڤەكرنا سەربڕخانەیێ ل دەڤەرا ئامێدیێ ئاریشە بۆ گۆشت فرۆشان دروستكرینە
ئامێدیێ، مەحمود نهێلی
زێدەباری ب داوی هاتنا پرۆژەیێ سەربرخانەیا دەڤەرا ئامێدیێ ل كۆمەلگەها قەدشێ یا گرێدایی ناوچەدارییا سەرسنكێ، لێ هێشتا ئەڤ سەربرخانەیە نەكەفتیە كاری و ئەڤ یەكی ژی بوویە جهێ گازندا وەلاتیان وگوشت فرۆشان و داخواز دكەن ئەڤ سەربرخانە بهێتە ڤەكرن و ئەڤ ئاریشەیا وانا بهێتە چارەسەركرن.
ئیك ژ گوشت فروشان بۆ رۆژناما ئەڤرۆ دیاركر، تا نوكە چ جهەكی باش نەهاتیە دیتن بۆ سەرژێكرنا پەز و ئاژەلی و گۆت: (ئەڤ یەكە بۆ مە وەك گوشت فروشت بوویە ئاریشە، چونكو گەلەك جاران ژ بەر نەبوونا جهێ سەرژێكرنا ئاژەلی هند ژ گوشت فروشان ل بەر دەرگەهێ گوشتفروشیێ ئاژەلی سەر ژێك ژ دكەن و چێدبیت ئاریشەیێن ساخلەمیێ ژی لێ دروست ببن ئەڤە زێدەباری وێ یەكێ دهێنە سزادان).
ئەیاز محەمەد نوژدارێ ڤێتێرنەریێ بەرپرسێ بنگەهێ ڤێتێنەریا ئامێدیێ دیاركر، ئێك ژ پرۆژەیێن گرنگێن دەڤەرا ئامێدیێ پرۆژەیێ سەربرخانەیا قەدشێ یە كو سەربرخانەیەیەكا هەڤچەرخە و دێ خزمەتا هەموو خەلكێ دەڤەرێ كەتن و گۆت: ئەگەرێ گیرو بوونا ڤەكرنا وێ ڤەدگەریت بۆ هەبوونا هەژمارەكا كێم یا كێماسیان و دهێتە چاڤەرێكرن ئەو ئاریشەیە ژی د دەمەكێ نێزیك بهێنە چارەسەركرن و بكەڤیتە د خزمەتا وەلاتیان دا.
و ئاشكرا كر، گرنگیا ڤەكرنا ڤێ سەربرخانەیێ زێدەباری پاراستنا ژینگەهێ و ساخلەمیێ دێ وەكەت ئەڤ ئاژەلێن دهێنە سەرژێكرن هەموو ل ژێر چاڤدێریا ڤێتێرنەریێ دا بیت بەری بهێتە ڤەكوشتن و پشتی دهێتە ڤەكوشتن ژی و تا دگەهیتە دوكانێن گوشت فرۆشان ژی هەموو دێ ل ژێرچاڤدێریێ بیت.
پرۆژەیێ سەربرخانەیان قەدشێ ب بهایێ دورێن ئێك ملیار دیناران هاتیە چێكرن و نێزیكێ دو سالایە كار تێدا ب داوی هاتیە، لێ تا نوكە نەكەفتیە كاری و ب ڤەكرنا وێ دێ پتر ژ 30 گوشت فرۆشان ل دەڤەرا ئامێدیێ مفای ژێ وەرگرن كو نوكە بارا پترێ ژ وانا ب رەنگەكێ نە ساخلەم ئاژەلی ڤەدكوژن و ئەڤ یەكە ژی دبیتە مەترسیێ ل سەر ساخلەمیا ولاتیان.
