نە هەر نەخۆشەکێ شەکرێ مفای ژ ڕۆژیێ دبینیت

د. ولید مصطفی

هەیڤا ڕەمەزانێ دا، گەلەک ژ نەخۆشێن شەکرێ دکەڤنە د گۆمانێ دا کا ئەرێ بشێن ڕۆژیێ بگرن یان نە؟ و چاوان بشێن ساخلەمیا خۆ بپارێزن؟
د. ولید مصطفی،تایبەتمەندێ نەخۆشیێن دل و هناڤا و شەکرێ، دیار دکەت دا کو ب سلامەتی ڤێ فەریزێ بجهـ بینن.
​کی نابیت ڕۆژیێ بگریت؟
​د. ولید ئاماژێ ب هندێ دکەت کو نە هەموو نەخۆشێن شەکرێ دشێن ڕۆژیێ بگرن. ئەو کەسێن ڕێژا شەکرێ ل دەف وان یا جێگیر نەبیت و بۆ دەمەکێ درێژ نەهاتبیتە کۆنترۆلکرن، یان ئەوێن کارێن گران و ب زەحمەت دکەن کو مەترسیا کێمبوونا شەکرێ ل دەف هەبیت، پێدڤیە ڕۆژیێ نەگرن. دکتۆر دیار دکەت کو مەرەما سەرەکی پاراستنا ژیانا نەخۆشی یە ژ هەر سەربارەکا مەترسیدار.
* هێلێن سۆر و شکاندنا ڕۆژیێ
​د. ولید مصطفی دوپات دکەت کو پێدڤیە نەخۆش چاڤدێریا ڕێژا شەکرێ بکەت و د ڤان حالەتان دا ئێکسەر ڕۆژیا خۆ بشکێنیت:
* ​ئەگەر ڕێژا شەکرێ ژ 300 بلندتر بیت: ئەڤە نیشانەکا مەترسیدارە و دبیت ببیتە ئەگەرێ ترشبوونا خوینێ.
* ​ئەگەر ڕێژا شەکرێ ژ 70 کێمتر بیت: ئەڤە ژی دبیته ئەگەرێ بێهێزیێ و ژ دەستدانا هۆشی (غەیبۆبە).
​هەروەسا دکتۆر هوشداریێ ددەت ژ نیشانێن وەک: (لەرزینا لەشی، دلقوتان، برسیبوونا زێدە، و زک ئێشان)، و دبێژیت “هەتا هەکە ئامیرێ پێڤانێ ژی ل دەف نەبیت، ب دیتنا ڤان نیشانان پێدڤیە نەخۆش ڕۆژیا خۆ بخۆت”.
​مفایێن ڕۆژیێ بۆ حالەتێن جێگیر
​ل لایەکێ دی، د. ولید ئاماژێ ب مفایێن ڕۆژیێ ژی دکەت بۆ ئەو کەسێن شەکرا وان یا جێگیرە، وەک کێمکرنا کێشا لەشی و ڕێخستنا خوارنێ، هەروەسا دەرفەتەکا زێڕینە بۆ ئەوێن دڤێن جگارێ بهێلن، کو ئەڤە هەموو د بەرژەوەندیا ساخلەمیا دل و دەمارێن خوینێ دانە.
* ​پلانا خوارنا فتارێ
​بۆ هندێ کو پشتی فتارێ شەکر ژ نشکەکێڤە بلند نەبیت، د. ولید شیرەتێ دکەت کو خوارن ب ڤی ڕەنگی ل سەر دو قۆناغان بهێتە دابەشکرن:
​قۆناغا ئێکێ: ب ئاڤەکێ و یەک یان دو قەسپان دگەل ماعونەکا بچووک یا شۆربێ دەستپێ بکەت.
​قۆناغا دوێ: پشتی دەمژمێرەکێ ژ قۆناغا ئێکێ، دشێت دەست ب خوارنا سەرەکی بکەت، دا کو لەش بشێت ب ئاوایەکێ هێدی شەکرێ و وزەیێ وەربگریت.

کۆمێنتا تە