هاتنا گەشتیاران بۆ دەڤەرا ئامێدیێ ب رێژەیا 15% زێدەبوویە
ئامێدیێ، مەحمود نهێلی:
د رۆژێن جەژنا قوربانی دا هەژمارەكا زۆرا گەشتیاران سەرەدانا جهێن گەشتیاری یێن دەڤەرا ئامێدیێ كر و ل دووڤ ئامارێن رێڤەبەریا گەشتوگوزارا ئامێدیێ ژی ئەڤ سالە 15% رێژەیا گەشتیاران زێدە بوویە.
حكمەت عابد، بەرپرسێ راگەهاندنا گەشتوگوزارا ئامێدیێ بۆ رۆژناما ئەڤرۆ دیار كر، د رۆژێن دەرباز بوویی دا 73 هزار و 426 گەشتیاران سەرەدانا جهێن گەشتیاری یێن دەەڤەرا ئامێدیێ كریە و ژ وانا ژی 13 هزار و 426 گەشتیار ب شەڤێ ل ئۆتێل و مۆتێلێن دەڤەرێ ماینە و دۆرێن 60 هزاران ژی ب رۆژێ هاتینە و ب شەڤ ڤەگەڕیاینە مالێن خوە یان ژی سەنتەرێ پارێزگەها دهۆكێ.
حكمەتی گۆت: «د ڤێ جەژنێ دا هاتنا گەشتیاران ب رێژەیا 15% زێدەبوویە هەمبەركرن ل گەل جەژنا رەمەزانێ، ئەگەر ژی بۆ درێژییا ماوێ بێهنڤەدانێ و بلندبوونا پلێن گەرمێ ل ناڤەراست و باشوورێ ئیراقێ و جوانی و هوینكاتیا سەقایێ دەڤەرا ئامێدیێ ڤەدگەڕن».
ناڤهاتی سوپاسیا دەزگەهێن حكومی و ئەمنی و راگەهاندنێ و خودانێن جهێن گوزاری ل دەڤەرا ئامێدیێ كر و گۆت: «رۆلێ وان یێ سەرەكی بوویە ژ بۆ زێدەكرنا رێژەیا گەشتیاران ل دەڤەرێ و سەرەدەریكرنا وان ل گەل گەشتیاران و پاراستنا ئەمنیەتا وان جهێ رێزگرتنێ بوویە».