هاتنوچوونا دهۆكێ رێنومایی بۆ ترۆمبێلێن كارێ كڕینا كەلوپەلان دكەن دەرئێخستن
دهۆك، لەزگین جۆقی:
رێڤەبەریا هاتنوچوونا دهۆكێ چەند رێنمایی بۆ وان ترۆمبێلێن گەڕۆك یێن كڕین و فرۆتن و كۆمكرنا كەلوپەلان د ناڤ تاخان دا دكەن دەرئێخستن.
رێڤەبەریا هاتنوچوونا دهۆكێ دیار كر، كارێ وان ترۆمبێلان ژ دەمژمێر 10ی سپێدێ هەتا بانگێ مەغرەب بیت و نابیت هۆرنان لێبدەن و گازییا دەنگی بكاربینن، بەلكو ب تنێ دشێن دەنگێ میۆزیكێ یێ ژ لایێ رێڤەبەرییا هاتنوچوونێ ڤە هاتیە دەستنیشانكرن بكاربینن و ترۆمبێلێن ڤی كاری دكەن پێدڤیە ل دووڤ یاسا و رێنمایێن رێڤەبەرییا هاتنوچوونێ كار بكەن.
ئاشكرا ژی كر، نابیت شۆفێر و كرێكارێن د گەل دا د ناڤ ترۆمبێلێ دا ل پاركان یان مزگەفتان یان دناڤ گەڕەكان دا بنڤن، بەلكو پێدڤیە ل مۆتێلان یان ئۆتێلان یان جهێن ئاكنجیبوونا خوە بنڤن.
زێدەتر دبێژت: نابیت ژ دو كەسان پتر د ترۆمبێلێ دا ڤی كاری بكەن و نابیت سنێلە ڤی كاری بكەن و نابیت گەڕیانا وان ل جهێن ڤەدەر بیت وەكی مەزرەعەیان و رەز و باغچەیێن دەرڤەی گوند و باژێران و رێكپێدان ب وان دهێتەدان پشتی رازیبوونا لژنەیا كاروبارێن ناڤخوە ل پارێزگەها دهۆكێ دهێتە وەرگرتن و هەر ترۆمبێلەكا بێ دەستووری كار بكەت دەملدەست دێ هێتە راگرتن هەتا دەستوریێ وەربگریت.
رێڤەبەریا هاتنوچوونا دهۆكێ دیار كر، هەر كەسەكێ مەرجێن كاری نەبن و ڤی كاری بكەت دێ پێرابوونێن یاسایی ل گەل هێنە وەرگرتن.
