هاتنوچوونا دهۆكێ چەندین رێنوما بۆ شووفێر و بەربژاران دەرئێخستن
دهۆك، لەزگین جۆقی:
رێڤەبەرییا هاتنوچوونا پارێزگەها دهۆكێ داخوازێ ژ هەمی لایەنێن سیاسی و بەربژاران دكەت، پێگریێ ب رێنومایێن هاتنوچوونێ بكەن د دەمێ بانگەشەیا هەلبژارتنان دا و وێنە و پۆستەرێن خۆ ب ستوونێن ترافیك و نیشانێن هاتنوچوونێ ڤە نە هەلاویسن.
رێڤەبەریا هاتنوچوونا پارێزگەها دهۆكێ راگەهاند، پێدڤیە وێنەیێن مەزن ل نێزیكی دووڕیانان، ئانكو (فلكان) و سەر شوستەیان نەهێنە دانان، كو ببنە ئەگەرێ نەدیتنێ و مەترسیێ ل سەر شوفێران، پێدڤیە پۆستەرێن مەزن ب باشی بهێنە ئاسێكرن، ژبەر هرۆبایان، داكو نەبنە مەترسی ل سەر گیانێ وەلاتیان و ترۆمبێلان.
هاتنوچوونا دهۆكێ داخوازێ ژ هەمی بەربژار و لایەنێن سیاسی دكەت، دەمێ بانگەشەیێ دكەن، نابیت ترۆمبێلێن بارهەلگر بكاربینن و نابیت ب چو شیوەیەكی رێك و جادە و كۆلان بهێنە گرتن، ژ بەركو دبیتە ئەگەرێ ئالۆزی و ئاستەنگێن هاتنوچوونێ، ب تایبەت بۆ حالەتێن هەوارهاتنێ و تەنگاڤیان و رەنگە كاریگەرێن خراب ل سەر رەوشا بازاری و بكەت.
هاتنوچوونا دهۆكێ دیار ژی دكەت كو دانانا پۆستەرێن بەربژاران ل جهین پیادە و چەپێن دژوار و لۆفەیێن كۆرە و جهێن بەرتەنگ قەدەغەیە، ژ بەركو دبنە رێگر بۆ هاتنوچوونا ترۆمبێلان ل سەر جادەیان، دیسا نابیت ئالا و لۆگۆ و وێنەیێن بەربژاران ب جام و تابلۆ و دەرگەه و بوندێ ترۆمبێلان ڤە بهێنە خەملاندن و هەلاویستن.
هاتنوچوونا پارێزگەها دهۆكێ گۆت: «پێدڤیە هەر لایەنەكێ ترۆمبێلا كرێن یان سلنگ بكاربینیت، پێشوەخت دەستووریێ ژ رێڤەریا هاتنوچوونا پارێزگەها دهۆكێ وەربگریت».
