هارون ئه‌حمه‌د: نووكرنا گرێبه‌ستا دالكورد به‌رده‌وامی دانه ب ئارمانجێن من
ئه‌ڤرۆ،
د دیداره‌كێ دا یاریزانێ باژێرێ ئاكرێ و تیما ته پاپێی یا یانا دالكورد یا سویدی ئه‌وا پشكدار د خولا پلا دو دا دیاركر كو بۆ دو وه‌رزێن دی لدووڤ ئێك گرێبه‌ستا خوه ل گه‌ل یانێ درێژكریه سه‌رباری داخازایا وان سێ سالا بوون و ئه‌ڤچه‌نده ژی به‌رده‌وامی دانه ب ئه‌وان ئارمانجێن من ب خوه داناین.
زێده‌تر هارون ئه‌حمه‌د بۆ رۆژناما ئه‌ڤرۆ گوت: ل گه‌ل یانا خوه یێ كه‌یفخووشم و شیاینه د وه‌رزێ بوری دا پێنگاڤێن باش پاڤێژین و هه‌روه‌سان به‌رده‌وامم ل سه‌ر ئارمانجێن خوه و هیڤیێن مه‌زن من هه‌نه له‌ورا بۆ دو وه‌رزێن بهێت من گرێبه‌ستا خوه نووكریه سه‌رباری چه‌ند یانێن مه‌زن د خولا ئیراقێ دا وه‌كو زاخۆ، مینا و هه‌ولێر و هه‌روه‌سان كازمیه یا كوێتی داخازا گرێبه‌ستی كربوون و هه‌روه‌سان یانه‌كا پلا نایابا سویدی دووڤچوونا ئاستێ من دكه‌ن لێ ل گه‌ل یانا دالكور یێ شادم و ئارمانجا مه تیما خوه ژ پلا دو بۆ یا ئێكێ سۆپریتان سه‌ربێخین و به‌ره ب پلا نایاب ئیلسڤیسكان ببه‌ین و ئه‌ڤ ئارمانجه یا كارگێریێ یه ژی و پلانێن باش بۆ دهێنه دانان.
ژلایه‌كێ دیڤه ناڤهاتی ئه‌وچه‌نده دیاركر كو ل گه‌ل یانا خوه یا هه‌موو خه‌لكێ كوردستانێ هه‌ست پێ دكه‌ت گه‌له‌ك مفا ژێ وه‌رگریته تایبه‌ت ژلایه‌نێ چه‌سته‌یی و هونه‌ری ڤه و گوت: دێ به‌رده‌وامبم خوه پێشئێخم و هێشتا من شیان یێن ماین كو پێشكێشی یانا خوه بكه‌م و دێ رژدبین وه‌رزێ نوو دا ب هێزترین ئاست و شیان هه‌ڤڕكیێ بۆ ناسناڤێ خولی بكه‌ین.
هارون ئه‌حمه‌دی شیانێن یاریزانێن كورد ب چو كێمتر نابینت ژ یاریزانێن دی و گوت: پشتراستم هه‌كه یاریزانێن مه یێن كورد ب شێوه‌كێ رێكخستی و راهێنان لدووڤ پلانێن رێكۆپێك سه‌ره‌ده‌ریی ل گه‌ل به‌هره‌یا خوه بكه‌ت شیانێن باش هه‌نه ل یانێن ئورۆپا بكه‌ت و داخازكرنا هه‌ردو یاریزانێن پارێزگه‌هێ و یانا دهۆكێ ئه‌حمه‌د سه‌بری و یاسر قاسم بۆ یانا دالكورا سویدی ئێك ژ وان به‌لگه‌یا یه و هیڤییا من ئه‌وه شیابم ده‌رگه‌هی بۆ یاریزانێن كورد ڤه‌كربیت خوه پێشبێخن و به‌ره ب ئارمانجێن مه‌زن بچن.
