هاریكارێ رێڤه‌به‌رێ نه‌خۆشخانا ئازادی: كارمه‌ندێن ساخله‌میێ پشكه‌كا گرنگن و پێدڤیه كارمه‌ندێن خۆبه‌خش و گرێبه‌ست بهێته دامه‌زراندن
دهۆك، بێوار شوكری:
خالد سه‌لیم ئه‌مین رێكانی، هاریكارێ رێڤه‌به‌رێ نه‌خۆشخانا ئازادی بو كارۆبارێن كارمه‌ندێن ساخله‌میێ دیاركر ب بریارا رێڤه‌به‌ریا گشتی یا ساخله‌میا دهۆكێ و رێڤه‌به‌ریا نه‌خۆشخانا ئازادی ل 5/8/27021 چه‌ند به‌شێن نه‌خۆشخانا ئازادی بهێنه ته‌رخانكرن بو نه‌خۆشێن كۆرۆنایێ و ده‌سپێكێ قاتێ ئێكێ یێ نه‌خۆشخانێ هاته‌ڤه‌كرن بو نه‌خۆشێن كۆرونایێ ده‌مێ رێژه ل دهۆكێ زێده بوویی ب نه‌چاری هاته ته‌رخانكرن، هه‌می رێكارێن ساخله‌مێ گرتنه به‌ر كو نه‌خۆشێن كۆرۆنایێ تێكه‌لی نه‌خۆشێن دی نه‌بن، و نه‌خۆشخانه كارێ خوه هه‌ر دكه‌تن و قاتێن دی ژی به‌رده‌وامن د خزمه‌تكرنا نه‌خۆشان دا، به‌س قاتێ ئێكێ هاتیه جوداكرن ژ قاتێن دی و رێیه‌كا تایبه‌ت هاتیه جوداكرن بو ئه‌و كه‌سێن دچنه قاتێ ئێكێ چ تێكه‌لی ناهێته‌كرن.
خالد سه‌لیم ئه‌مین رێكانی، هاریكارێ رێڤه‌به‌رێ نه‌خوشخانا ئازادی بو كاروبارێن كارمه‌ندێن ساخله‌میێ، ئه‌و كه‌سێ هه‌ست ب نیشانێن كۆرۆنایێ دكه‌ن ده‌سپێكێ پێدڤیه سه‌ره‌دانا شیره‌تكاریا نه‌خۆشخانا كۆرۆنایێ بكه‌ت ل وێرێ دهێنه ره‌وانه‌كرن بو نه‌خۆشخانێن كۆرۆنایێ و هه‌روه‌سا نه‌خۆشخانا ئازادی ژی و گۆت: ل قاتێ ئێكێ مه 38 ته‌خت هه‌نه 15 ئامیرێن هه‌نایسا ده‌ستكرد هه‌نه و ئه‌و نه‌خۆشێن دهێنه داخلكرن هه‌می پێدڤیێن وان به‌هه‌فكرینه، ئه‌گه‌ر نه‌خۆش زێده‌بوون مه ل پشكا ده‌روونی ژی 22 ته‌خت هه‌نه، هه‌روه‌سا مه پشكا نه‌زوكیێ ئاماده‌كریه بو نه‌خوشان، به‌هرا پتر ئه‌و نه‌خۆشێن دهێنه ره‌واه‌كرن بو نه‌خۆشخانا ئازادی ئه‌ون یێن بێهنا وان یا ته‌نگ دبیت.
هاریكارێ رێڤه‌به‌رێ نه‌خۆشخانا ئازادی دیاركركو ئه‌و رولێ كارمه‌ندێن ساخله‌میێ دگێرن ب تایبه‌ت دڤێ ره‌وشا نوكه یا كۆرۆنایێ دا كاره‌كێ گرنگه و گۆتژی: ل ده‌سپێكێ هه‌می كه‌س نه‌شیان تێكه‌لی ڤێ نه‌خۆشیێ ببن، چونكو نه‌خۆشیه‌كا نوی و ب مه‌ترسی بوو، كارمه‌ندێن ساخله‌میێ پشكه‌كا گرنگن ژ پێكهاتێن ساخله‌میێ، ده‌ستپێكێ كادرێ مه ئه‌و كار دكر و نوكه تیمێن تایبه‌ت كار ل گه‌ل كۆرۆنایێ دكه‌ن، به‌رده‌وام رێنمایێن ساخله‌میێ ب كاردئینن.
خالد سه‌لیم ئه‌مین رێكانی هاریكارێ رێڤه‌به‌رێ نه‌خوشخانا ئازادی بو كاروبارێن كارمه‌ندێن ساخله‌میێ ، دیارك ركو كارمه‌ندێن ساخله‌میێ ستوونا هه‌ر نه‌خۆشخانه‌یه‌كێ نه، چونكو كارمه‌ندێن ساخله‌میێ خالا پێكڤه‌گرێدانێ یه دنافبه‌را نۆشداری و نه‌خۆشی دا ئه‌ڤان كارمه‌ندان 24 ده‌مژمێرا په‌یوه‌ندی دگه‌ل نه‌خۆشی هه‌نه و هه‌می زانیاریێن نه‌خۆشی توماردكه‌ت و چاڤدێریا وی دكه‌ت هه‌تا نۆشدار دهێت وان زانیاریا شرۆڤه‌كه‌ن و گۆت: هژمارا كارمه‌ندێن ساخله‌میێ گه‌له‌ك یا كێمه ژ 2013 هه‌تا نوكه ده‌رچویێن په‌یمانگه‌ه و كولیژا نه‌هاتینه دامه‌زراندن ئه‌ڤه ئێك ژ ئه‌گه‌رێن كێمبوونا كارمه‌ندێن ساخله‌میێ یه، ل دووف ستانده‌ردێن جیهانی هه‌ر ده‌ه هزار كه‌سان پێدڤی ب 29 كامه‌ندێن ساخله‌میێ هه‌یه، مه ل دهۆكێ نوكه ب كێماتی پێدڤی ب چار هزار كارمه‌نداینه مه ئه‌ف رێژا ده‌رچوونێ هه‌یه به‌س نه د دامه‌زراندی نه و ده‌رچوویێن ڤان جهان ب تنێ دشێن ببنه گرێبه‌ست یان خۆبه‌خش و رێژه‌كا مه‌زن یا گرێبه‌ست و خۆبه‌خشان مه هه‌نه، پێدڤیه ده‌رگه‌هێ دامه‌زراندنێ بهێته ڤه‌كرن چونكو ئه‌م د پێدڤینه و دێ هه‌ر خزمه‌تا مه و خه‌لكێ مه هێته‌كرن.
