هزار و 100 جۆتیارێن زاخۆ بەرهەمێن هاڤینێ چاندینە
زاخۆ، دلۆڤان هالۆ:
ل سنوورێ ئیدارا سەربەخۆ یا زاخۆ هزار و 100 جۆتیاران بەرهەمێن چاندنێ یێن وەرزێ هاڤینێ چاندینە، و پشكەك ژ وی بەرهەمی گەهشتییە و پشكەكا دی ژی دەمەكێ كێم مایە بۆ گەهشتنێ، ب ڤێ چەندێ گۆمركێن زاخۆ ژ بەرهەمێ خۆمالی یێن دەڤەرێ پڕ بووینە. جۆتیارێن دەڤەرێ ژی دخوازن ڕێك ل هاتنا بەرهەمێن بیانی بهێتە گرتن، دا كو زەرەرمەند نەبن و ماندیبوونا وان یا سالەكێ ب هەروە نەچیت.
محسن ئیسماعیل، جۆتیارەكێ زاخۆیە بۆ ڕۆژناما ئەڤرۆ دیار كر، مە ئەڤ سالە گەلەك بەرهەمێن چاندنێ هەنە وەكو زەبەش و گۆندور و خۆخ و مژمژ و حلیك و كۆلند و خیار و باجان و پیڤاز و پتات و فلفل و بامی و خەس، و ئەم بەشەكێ وی بەرهەمێ خوە ل سەر جاددەیا سەرەكی ل تەنشت زەڤیێن خوە د فرۆشین و بەشەكێ دی ژی د فڕۆشینە عەلوەیێ، لەوڕا ئەم دخوازن بەرهەمێ بیانی ژ دەرڤە نەهێت و گرنگی ب بەرهەمێ خۆمالی بهێتە دان.
نەجمەددین حسێن، ئێكە ژ خودانێن عەلوەیێ ل زاخۆ گۆت:» ژبەر تام و ناڤودەنگییا بەرهەمێ خۆمالی ب تایبەت یێ دەڤەرا زاخۆ، داخوازی ل سەر كڕینا بەرهەمێ ناڤخۆ زێدە بوویە، د بەرامبەر دا داخوازی ل سەر بەرهەمێن بیانی كێم بوویە، چونكو بەرهەمێ مە پلە ئێكە و یێ بتامە و ب كێر خوارنێ دهێت، لێ بەرهەمێ بیانی ب تایبەت بەرهەمێ توركی نەخوەشە، چونكی هەمی یێ بەرادانە و بێ تامە، مە گەلەك جۆرێن بەرهەمێن چاندنێ هەنە و مە منەت ب یێ ژ دەرڤە نینە».
سەلمان محەمەد، بەرپرسێ ڕێڤەبەریا گشتی یا چاندنێ ل زاخۆ گۆت:»ڕۆزناما چاندنێ هاتییە دابەشكرن ل سەر دەرگەهێن سنووری، ب شێوەیەكێ گشتی ل دەمێ پێگەهشتنا هەر بەرهەمەكێ چاندنێ و هاتنا وی جۆرە بەرهەمی بۆ ناڤ هەرێما كوردستانێ دهێتە قەدەغەكرن، دا كو جۆتیارێن مە زەرەرمەند نەبن، لەوما ب ڤێ چەندێ ئەم پشتەڤانیا جۆتیارێن خوە دكەین و ڕێپێدانێ بۆ دروست دكەین ژ بۆ هنارتنا بەرهەمێن وان یێن چاندنێ بۆ خوار و ناڤەڕاستا عێراقێ، دا كو بەرهەمێ وان ژناڤ نەچیت و زەرەرمەند نەبن».
