هزار و 59 پارچەیێن ئەردی ل ئاكرێ دێ هێنە بەلاڤكرن
ئاكرێ، رەمەزان زەكەریا:
ب بڕیارا حكومەتا هەرێما كوردستانێ پارچەیێن ئەردی ل سەر فەرمانبەران و پێشمەرگەیان و زیندانیێن سیاسی ل سنوورێ دەڤەرداریا ئاكرێ دێ هێنە بەلاڤكرن.
د. دلاوەر بۆزۆ، دەڤەردارێ ئاكرێ د كۆنگرەكێ رۆژنامەڤانی دا راگەهاند: ب بڕیارا مەسرور بارزانی، سەرۆكێ حكومەتا هەرێما كوردستانێ، پارچەیێن ئەردی ل سەر فەرمانبەران و پێشمەرگەیان ل سنوورێ دەڤەرداریا ئاكرێ دێ هێنە بەلاڤكرن و گۆت: «ئەو پارچەیێن ئەردی یێن ل بەردەست هەژمارا وان هزار و 59 پارچەیێن ئەردی نە و ل سەر فەرمانبەر و پێشمەرگە و وەلاتی و خودان پێدڤیێن تایبەت دێ هێنە بەلاڤكرن».
ناڤبری گۆتژی: «بڕیارە رۆژا چارشەمبی 30/10/2024 و ل دەمژمێر 10ێ سپێدێ ل هولا كۆنفرانسان ل ئاكرێ ب بەرهەڤبوونا د. عەلی تەتەر، پارێزگارێ دهۆكێ و نوونەرێ داخوازكارێ گشتی و لایەنێن پەیوەندیدار ئەو پارچەیێن ئەردی دێ هێنە بەلاڤكرن وەك قووناغا ئێكێ و دەستپێكێ».
دەڤەردارێ ئاكرێ ئاشكرا ژی كر، پشتی تەمامبوونا قووناغا ئێكێ و چەند رێكارێن ئیداری، قووناغا دویێ ژی دێ دەستپێكەت و ئەڤ پرۆسە دێ یا بەردەوام بیت.
دیسا بلند رزا، سەرۆكێ باژێرڤانیا ئاكرێ د وی كۆنگرێ رۆژنامەڤانی دا گۆت: «ئەو پارچەیێن ئەردی، یێن بڕیارە ل سەر فەرمانبەران و پێشمەرگەیان ل سنوورێ دەڤەرداریا ئاكرێ بهێنە بەلاڤكرن دكەڤنە سماقوك و ئۆمەرخۆشان و شیفەكیر و ئالەیێ، مۆلكیەتا وان هزار و 59 پارچەیێن ئەردی باژێرڤانییە، ل گەل هژمارەكا پارچە ئەردان ل بیوكێ نە ، ب رێكا تیرۆپشكێ دێ هێنە بەلاڤكرن».
بلند رزا گۆتژی: «بەلاڤكرنا پارچەیێن ئەرد دێ بەردەوام بیت، هەر دەما رێكارێن بەلاڤكرنێ تەمامبوون، دێ قووناغێن دویێ و دووڤرا بەردەوام بن، ئەوێن مایی ژی د قووناغا داهاتی دا دێ هێنە بەلاڤكرن».
