هزرڤانێ مه نهشێت ببیته هێما
د ئێكدو بابهتێن بۆریدا باوهریهك هاتبوو دروستكرن كو وهرگر ل وى ئاستى نینه هێما د ناڤ كوردان دا دروست ببن و ئهڤه راستیهكه، لێ بێگۆمان ئهو راستى ههمى نینه بهلكى هندهكا راستیێ یه و هندهكا دى بۆ هزرڤانێ كورد بخوه ڤهدگهریت، ههكه ئهم بێژین كهسایهتیێن بلیمهت ل جیهانا سهردهم د ناڤ گهل و مللهتێن خوه دا بووینه هێما و ئالا و ناسنامه دڤیا مه ژى مفا ژ ئهزموون و سهربۆڕا وان وهرگرتبا، كورد بهرێ ههتا دوورترین ڕادده دانا و زانا بوون، وان دگۆت: ئهگهر نهزانى چاڤده جیرانى. گۆتنهكا پڕى رامان و فهلسهفهیه. لێ مخابن د ڤى سهردهمیدا نه ب تنێ خهلكێ ئاسایى بهلكو ههتا زانا و نڤیسهر و رهوشهنبیر ژى نهشیاینه مفایى ژ گۆتنا جوانا كوردان وهرگرن و گۆتنهكا دى كریه كهتووار ئهو ژى: رهشهكه دلێ خودانى خۆشكه. پرسیار ل ڤێرێ ئهڤهیه: بۆ كوردان بهرێ شیا خانى و جزیرى و باتهیى و تهیران و بایهزیدى و تهرهماخى و مهلایێ گهوره و مهسعوود محهمهد و هتد.. دروستكهن و بكهنه هێما و ل همبهرى زانا و فهیلهسۆفێن مهزنێن جیهانێ دانن و شانازیێ ب بهرههمێ وان بكهن و ئهڤرۆ نهشیاینه، بۆ كوردان دڤى سهردهمیدا محهمهد ئهرهگۆنهك یان تاها حوسێنهك یان عهلى وهردى یهك نهبیت، بۆ كوردان شاملۆ یهك یان نهسینهك یان ئهدۆنیسهك نهبیت، چنكو ب كۆرتى زانا و هزرڤانێن مه وهسا دبینن نڤیسین ب زمانێ ئهجنا و ب كارئینانا زاراڤێن هاڤى و خوه بلندتر دیتن ژ خواندهڤایى و ب كارئینانا یاریا نڤیسینا درێژ و پڕى پهیڤێن بیانى و خوه دووركرن ژ زمان و دارشتنا ئاسان و كێم پێزانین و نهپشتبهستن ب ژێدهران و هتد.. دێ وان بلندكهت! ژ من وهرگره ئهڤه رێكهكا شاشه و مفا تێدا نینه.
بۆ بجههاتنا ڤێ ئارمانجێ گهلهك بزاڤ یێن هاتینه كرن، لڤین و خۆماندیكرنهكا ب هێز هاتیهكرن، تشتهكێ مشه هاتیه نڤیسین، خهلكهكێ هاتیه هاندان تشتى ل سهر تشتێ وان بنڤیسن لێ ئهو بزاڤ ههموو ب ههروه چوون و چ هێما دروست نهبوون، زانایێ مه گهلهك بهرههم نڤیسى یه، لێ رێكێن هێمابوونێ نهزانینه، ههكه زانى بن ژى بكارنهئیناینه یان نهزانى یه بكاربینیت، رهخنهیێن زانستى و بابهتى و بهێز و بێ دلهیدلیدان نهبووینه، ههكه ههبن ژى ههر وان بخوه یێن رهتكرین و د بهرسڤێ دا گۆتیه ئهڤ كیندارى یه نه رهخنهیه، ئانكو دهروونێ سادهیێ مرۆڤێ كورد یێ نهرم و جوان و سۆزداره، نهشێت خوه ل بهر رێزكهكا رهخنێ بگریت، بهرههمێ شهوقى و سهلیم بهرهكات و عهلى جهواد تاهر یێ دبن هزار ههڤپهیڤین و رهخنهیێن توند و زڤرڕا دهربازبووینه ههتا گههشتینه سهردهمێ مه، جهنگێن مهزنێن رهخنه و دانوستاندنێ ل سهر دروست بووینه و د ئهنجامدا بووینه هێما و مللهتێن وان شانازیێ پێدكهن. ل نك مه خوه ل همبهر رهخنهیهكا فێسبۆكى ژى ناگرن و بهرسڤێن وان وهك برویسیێن زڤستانێ ئاگرینن. رهخنه ئهگهرهكێ مهزنێ دروستبوونا هێمایانه و د ههموو بیاڤان دا.
ژ خوه ریكلام ئهگهرێ سهرهكیێ دروستبوونا هێمایێن بلنده، فرهنسا و ئیسپانیا و رۆسیا و ئهمریكا لاتینى د دههكێن بۆریێن سالاندا گشت سازیێن خوه ئێخستیبوونه د خزمهتا زانا و هزرڤانێن خوه دا، ل نك مه تهخا رهوشهنبیر جۆره زكڕهشیهكا ب هێز ل همبهر ههڤدو ههیه، بابێ نازێ هزرڤانهكێ مهزنێ كورده دهمهكێ درێژ ل رۆسیا یێ ژیایى گۆت: جارهكێ نڤیسهرهكێ كورد بابهتهك ل رۆژنامهیهكا رۆسى بهلاڤكربوو، مه هندهك ههڤالان پێكڤه خواند، من گۆت رابن دا بچینه نك وى نڤیسهرى، دهستخۆشیێ لێبكهین و تێبینیێن خوه بێژینێ. ئهز ههتا دووماهیێ سهرهاتیێ نابێژم. ئهڤه هزرا دروستا ئێكودو راگرتنێ یه، بهرزكرنا بهرههمى یه، پرسیار ئهڤهیه: ل نك مه چاوا رهفتار دهێته كرن؟.
