هشیار زێباری: وه‌رزش ژ كه‌رتێن گرنگه پارتی پووته‌كا تایبه‌ت پێ دایه
ئه‌ڤرۆ،
ل شه‌ڤا ده‌ربازبوویی ب ئاماده‌بوونا هشیار زێباری ئه‌ندامێ مه‌كته‌با سیاسی یا پارتی دیموكراتی كوردستان و به‌رپرسێ لژنا بلندا هه‌لبژاتنان ل ده‌ڤه‌را بادینان و ژماره‌كا مه‌زن یا وه‌رزشڤانێن دێرین و یاریزانێن یانا دهۆكێ و پارێزگه‌هێ كه‌رنه‌ڤالێ پشته‌ڤانیێ بۆ كاندیدێن پارتی ل یاریگه‌ها یانا دهۆك هاته ئه‌نجامدان.
ل ده‌ستپێكێ سه‌رۆكێ یانا دهۆكێ بژار ئیسماعیل په‌یڤا ب خێرهاتنێ ل ئه‌ندامێ مه‌كته‌با سیاسی یا پارتی كر و دیاركر كو یانا دهۆك ب ده‌سته‌كا خوه یا گشتی ڤه پشته‌ڤانیا لیستا پارتی بۆ په‌رله‌مانێ ئیراقێ دكه‌ت ژبه‌ركو بتنێ پارتی گرنتیا پێشكه‌فتنا وه‌رزشێ ل كوردستانێ دده‌ت.
دووڤدا هشیار زێباری ئه‌ندامێ مه‌كته‌با سیاسی یا پارتی دیموكراتی كوردستان گۆتاره‌ك پێشكێشكر و گرنگیا ئه‌ڤان هه‌لبژارتنان دیاركر و ده‌نگدان بۆ كاندیدێن پارتی پێخه‌مه‌ت پاراستنا مافێن كوردستانیان ل به‌غدا و گوت: وه‌رزش ئێك ژ كه‌رتێن هه‌ره گرنگه پارتی پشته‌ڤانیێ لێ دكه‌ت و رۆلێ وێ بۆ پێشڤه‌برنا ملله‌تان ب گرنگی دا زانین، دڤێت ئه‌م هه‌موو بچینه ده‌نگدانێ بۆ كاندیدێن پارتی ژبۆ پاراستنا ئه‌ڤان مافان و پێشئێخستنا به‌رده‌وام یا وه‌رزشێ له‌ورا ل 10/ 10 ئه‌م هه‌موو بچینه سندوقێن ده‌نگدانێ و كاندیدێن پارتی ب هه‌لبژێرین.
ژلایێ خوه‌ڤه فه‌هیم عه‌بدوللا وه‌رزشڤانێ دێرین یێ پارێزگه‌ها دهۆكێ و سه‌رۆكێ ئه‌نجوومه‌نێ پارێزگه‌هێ د په‌یڤا خوه دا ئه‌و پێشكه‌فتنا نوكه وه‌رزش تێدا ب هه‌بوونا یاریگه‌ه و هۆلێن وه‌رزشی ل سه‌ر ئاستێ نێڤدوه‌له‌تی و مێڤانداریا چه‌ندین قاره‌مانیێن جیهانی به‌لگه‌یه كو پارتی پشته‌ڤانا وه‌رزشێ یی، جه‌نابێ سه‌رۆك مه‌سعود بارزانی ل سالا 1998ێ ده‌مێ هاتیه یاریگه‌ها یانا دهۆك پشته‌ڤانیا خوه دیاركربوو و گۆت بوو، (بزاڤا وه‌رزشی چو كێمتر نینه ژ بزاڤا سیاسیی بو پێشكه‌فتنا ملله‌تان و دێ پشته‌ڤانبینن) ئه‌ز گه‌شبینم هه‌موو وه‌رزشڤانێن پارێزگه‌هێ ڤێ چه‌ندێ دزانن، له‌ورا ده‌نگدان ب به‌ربژێرێن پارتی ئه‌ركه‌كێ كوردایه‌تیه و پێدڤیه ب وژدانه ده‌نگێ خوه بده‌ن.