هشیار شه‌هباز: پشكدارییا تیما مه بۆ هه‌ڤڕكییا ناسناڤی یه
عەلی حاجی:
د داخویانیەکێ دا سکرتێرێ یانه‌یا زاخۆ یا وەرزشی بۆ رۆژناما ئەڤرۆ دیار کر ژبۆ ب ده‌ستڤه ئینانا ناسناڤێ خولا فوتسالا کوردستانێ وان تیمەکا باش دروست کریە و دو یاریزانێن ژ دەرڤەیی زاخۆ و دهۆکێ ئیناینە.
زێدەتر هشیار شەهباز گۆت: د وەرزێ بوری دا ب کچێن زاخۆ شیاین رێزا دویێ د خولا فوتسالا کوردستانێ دا ب دەستخوەڤە بینن ئەو ژی دەستکەڤتیەکا باش بوو، لەوما بۆ خولا ئەڤ سالە مە دخواست تیمەکا ب هێزتر دروست بکەین و هەر زوو کادرێ راهێنەران هاته دەستنیشانکرن و گرێبه‌ستا یاریزانان بەری نوکە یا بناڤ دەنگ و زیزویێ وەکو راهێنەر ئیمزا کر دگەل دا ژی ڤەمان وەکو هاریکارا راهێنەرێ، پاشی هەر ئێک ژ یاریزانان دێرین و دەریا و فائیزا مە دانوستاندن دگەل دا کرن و هەر سێ یاریزان رازیبوون لێ یانه‌یا ئافرەتێن هەولێرێ رازینەبوون دەستبەرداربونا یاریزان دێرینێ پێ بدەن بتنێ دەریا و فائیزا نوکە دا یاریزانێن مە نە.
ناڤبری گۆت ژی: ئەم یێ دانوستاندنا دگەل یاریزانا خوە یا وەرزێ بوری سیپەل شوکری دکەین ل هێڤیا بەرسڤا وێ ماینە و هەردەما رازی بوو دێ هەڤبەستێ دگەل دا ئیمزا کەین، دیسان مە یاریزانا خوە مەروا رازی کربوو کو بۆ وەرزێ ئەڤ سالە دگەل مە دا بمینیت لێ د رۆژا گرێدانا هەڤبەستێ دا ئامادە نەبوو و ژ بریارا خوە پەشیمان ببوو سه‌رباری بزاڤێن مه یێن رازیكرنێ، لەوما مە دەست ژ وێ و خویشکا وێ سولینێ بەردا و ئەڤ سالە هەمی ئارمانجێن مە برنا ناسناڤێ خولێ یە.
