هشیار شەهباز: دێ ٦٠% یاریزانێن خوە پارێزین
عەلی حاجی:
ژ بۆ وەرزێ نوو یێ خولا ستێرێن ئیراقێ یا فوتبۆلێ، کارگێریا یانەیا زاخۆ گرێبەستا چەندین یاریزانێن خوە نوو کریە و دانوستاندنێ دگەل چەند یاریزانەکێن دیتر دکەت.
هشیار شەهباز سکرتێرێ یانەیا زاخۆ گۆت: وەکو سالێن بوری کارگێریا یانەیا زاخۆ لژنەیەک ژبۆ نووکرن و ئینانا یاریزانان پێکئینایە بۆ هندێ بشێن تیمەکا رێکوپێک بۆ وەرزێ نوو دروست بکەین، د پلانا مە دایە هەتا ٦٠٪ پاراستنێ ل سەر یاریزانێن تیما خوە بکەین ژبەرکو رێژەیەکا بەرچاڤ ژ یاریزانێن مە گەلەک د باشن و شیابوون ئاستەکێ باش پێشکێشبکەن، هەتا نوکە دەستەیا ڕاهێنەران دگەل شەش یاریزانان خاترا خوە خواستینە، ئەم یێ کار دکەین ژبۆ هندێ د نێزیکترین دەم دا جهێ وان پر بکەین، هەتا نوکە هاتنا شێرکو کەریمی بوویە فەرمی و دەمەک نێزیک دا دێ هندەک گرێبەستێن نوو ژی ڕاگەهینن.
هەروەسان ناڤبری گۆت ژی: ئەم دگەل چەند ڕاهێنەرەکێن نافخۆ و بیانی د دانوستاندنێ داینە و هەر دەما مە ڕاهێنەرەکێ ژ هەژی دیت ئێکسەر دێ گرێبەستێ دگەل دا ئیمزا کەین.
ژلایێ خوەڤە تەها زاخۆیی ڕێڤەبەرێ تیمێ گۆت: ئەم دگەل چەند پێشەکارێن باش د دانوستاندنێ دانە ژ بۆ هندێ بیننە دناڤ رێزێن یانەیا زاخۆ دا، دەمەک گەلەک کورتە لێ ئەم یێ کارەکێ باش دکەین و پێدڤیە مە تیمەکا ب هێزتر ژ وەرزێ بوری هەبیت ژبەرکو ئەڤ سالە دێ مە گەلەک ئارمانج هەبن د خول و کوپا ئیراقێ دا، پشتەڤانیا سەرپەرشتێ ئیدارەیا سەربەخویا زاخۆ پێنگاڤەکا گرنگ بوو کو ئەم بشێن ڤان پێنگاڤا باڤێژین و ئەم جەماوەرێ خوە پشت راست دکەین کو دێ تیمەکا رێکوپێک ئاڤا کەین.
