هشیار فه‌ریق: خزمه‌تكرنا وه‌رزشا كوردستانێ گرنتره ژ یا ئیراقێ
ئه‌ڤرۆ،
د ئێكه‌م داخویانیا خوه دا وه‌كو سه‌رۆكێ نوو یێ ئێكه‌تیا پایسكلڤانێن كوردستانێ كوڕێ باژێرێ دهۆكێ هشیار فه‌ریق بۆ رۆژناما ئه‌ڤرۆ دیاركر كو پێخه‌مه‌ت خزمه‌تكرنا وه‌رزشا كوردستانێ ب گشتی و پارێزگه‌ها دهۆكێ ب تایبه‌تی رازیبووم ل سه‌ر وه‌رگرتنا پۆستێ سه‌رۆكێ نوو یێ ئێكه‌تیا پایسكلان و ده‌ست ژ پۆستێ ئه‌ندامه‌تیا ئێكه‌تیا پایسكلڤانێن ئیراقێ به‌ردا.
زێده‌تر ناڤهاتی گوت:هه‌رچه‌نده ماوێ كارێ مه ل گه‌ل یا ئیراقێ ساله‌ك مابوو و شیابووین چه‌ندین چالاكی و پێشڤه‌چوونا وه‌رزشا پایسكلان بۆ كوردستانێ و پارێزگه‌هێ بكه‌ین لێ پشتی ژلایێ رێڤه‌به‌ریا گشتی یا وه‌رزشی ل هه‌رێما كوردستانێ هاتینه راسپاردن بۆ وه‌رگرتنا پۆستێ ئێكه‌تیا پایسكلان ل هه‌رێمێ من ب شانازی ڤه ئه‌ڤ ئه‌ركه وه‌رگرتیه ژبه‌ركو خزمه‌تكرنا وه‌رزشا كوردستانێ گرنتره ژ یا ئیراقێ پێخه‌مه‌ت پێشئێخستنا ئه‌ڤێ وه‌رزشێ و دانانا به‌رنامه و پلانێن رێكخستی، پێنه‌ڤێت ئه‌ڤه كاره‌كێ مه‌زنه و پیروزه و هه‌مان ده‌م دا ب سانه‌هی نابیت لێ رژدین ل گه‌ل ده‌سته‌كا نوو كاره‌كێ دروست و پێشكه‌فتنا وه‌رزشا پایسكلان بكه‌ین.
ژلایه‌كێ دیڤه هشیار فه‌ریقی دیاركر كو لدویڤ یاسا نوو یا په‌رله‌مانێ ئیراقێ كو نابیت چو كه‌س ل دو كارێن فه‌رمی برێڤه‌ببه‌ت كو ئه‌ڤه ئه‌گه‌ره‌كێ سه‌ره‌كی بوو له‌ورا من ده‌ست ژ كارێ خوه ل ئێكه‌تیا ئیراقێ به‌ردا بۆ خاترا یا كوردستانێ و دیسان وه‌كو ئه‌ندامێ كارگێریا یانا دهۆكێ ژی سه‌رباری ئه‌ڤه 34 سالان دناڤ وه‌رزشا پایسكلان دا و 12 سالێن ل ئێكه‌تیا ئیراقێ دا كو پری خزمه‌ت و ده‌ست پێشخه‌ری و پێنگاڤێن پێشكه‌فتی د ماوێ كارێ خوه دا هاتینه كرن و گوت: ئه‌م چاڤه‌رێ ئێكه‌م كۆمبوونا لژنا ئۆلۆمپیا كوردستانێ نه ژبۆ دانانا سیسته‌م و په‌یره‌وێ نوو یێ كار و چالاكیێن ئێكه‌تیا ل هه‌رێمێ، هه‌رده‌مێ كۆمبوون هاته كرن مه به‌رنامێ خوه یێ هه‌یی بۆ هه‌ر چالاكیه‌كێ پێخه‌مه‌ت باشترین خزمه‌ت بۆ وه‌رزشا پایسكلان ل كوردستانێ.
