هشیار فەریق: ناسناڤ و دەركەفتنا نفشەكێ نوو گرنگترین دەستكەفتن
تیما پایسكلڤانێن یانەیا دهۆك ب ناسناڤێ قارەمانییا ئیراقێ بۆ وەرزێ 2023ێ هاتە خەلاتكرن، پشتی ل سەرجەمێ گشتی یێ هەرچار قۆناغێن هەڤڕكییان شیایین كۆنترۆلێ ل سەر رێزێن ئێكێ بكەن و پێشەنگییا خوە پارێزن، پشتی دوهی شیایین قۆناغا چارێ ژی پێشەنگییا بەریكانان بهێن و ناسناڤی مسۆگەركەن، د هەڤڕكیێن واندا ئەوا ل باژێرێ سلێمانیێ سەر ئاستێن تازەپێگەهشتی، لاوان، كچان و پێشكەفتیان ب سەرپەرشتییا فیدراسیونا پایسكلڤانێن ئیراقێ ب پشكدارییا 220 یاریزانان ژ 28 یانەیان ب دووماهی هاتی.
ل سەر ئاستێ تازەپێگەهشتییان یێ شێوازێ كت بۆ گشت یاریزانان ب سەرپەرشتیا هونەری یا راهێنەرێ تیمێ و هەر ئێك ژ یاریزانێن یانەیا دهۆك ئاریۆس سلێمان، یوسف عەرفان، ئیبراهیم سەمیر، یوسف جیهاد، ئەیهاب عومەر و بیرهات نەبی شیابوون د بەریكانەیا 15كم و دیسان 60كم بۆ شێوازێ گشت تیمان و كت دژی دەمژمێرێ هاتبوو كرن.
ل دۆر ڤان ئەنجامان و ناسناڤێ ئیراقێ هشیار فەریق ئەندامێ كارگێرییا یانەیا دهۆك و سەرپەرشتێ تیمێ بۆ رۆژنامەیا ئەڤرۆ گۆت: پشتی ماندیبوونەكا درێژ و راهێنانێن بەردەوام ب پلان، تیما تازەپێگەهشتیێن یانەیا دهۆك گەهشتە ئارمانجا خوە ئەو ژی ناسناڤێ قارەمانییا ئیراقێ ب دەستڤە ئینا، كاروانەكێ درێژ بوو لێ كارەكێ مەزن و ب كۆم هاتە كرن ب زاخەكا بلند یا یاریزانان و راهێنەرێ تیمێ و پشتەڤانییا بەردەوام یا كارگێرییا یانەیێ بوو ئەگەر ب گەهینە ناسناڤێ ئیراقێ.
هەروەسان ناڤهاتی گۆت: ب دیتنا من ناسناڤێ ئیراقێ و دەركەفتنا نڤشەكێ نوو یێ یاریزانێن تازەپێگەهشتییان بوویە دەستكەفتەكێ زێرین، ژبەركو ئەڤ كۆمەك نوكە یا باش ژ یاریزانان پاشەرۆژا یانەیێ هاتنە دیتن وەكو تیمەكا بوو جهێ سەرنجراكێشا پشكداران، لەوما نە بتنێ ناسناڤ بەلكو دەركەفتنا نڤشەكێ نوو ژی بۆ دەستكەفتێ پاشەرۆژا وەرزشا پایسكلان ل پارێزگەها دهۆكێ، ئەڤچەندە ژی پێدڤی ب پشتەڤانییا دارایی یە ژ یانەیێ و بەرپرسێن پەیوەندیدار.
