هـەر ئێك ژ یێ دی وێڤـەترە
رەمەزان ئیسماعیل گەرەگوهی
كوڕ..
كوڕ چ كوڕە! خودانێ پڕچەكێ مینا قەترانێ ڕەش و تەیسۆكە، ل هنداڤی وێ ئەنیا كەڤەر و سپی مینا كەڤیەكا بەفرێ ل زۆزانێن فەڕاشین و سەرحەدا، چەوانەكێ ڕۆژ ل دەمێ نیڤرۆ و ل ئەسمانێ ساهی یا گەش و زیقە و چەوانەكێ هەیڤا چاردێ ل نیڤا شەڤا تاری ڕۆهن دكەت و دبرسقیت و ئەو هەیڤ و ڕۆژ هەر دو پێكڤە ژۆردا سەح دكەنە وی كوڕی و شەرم ژ جوانی و بەدەوی یا وی دكەن، ئەها وەسا و هند یێ لاو و جوان و نەسێلهە، گەنجەكێ خوین گەرم، ژیێ وی شازدە بەر ب هەڤدە سالیێ ڤە، ژ نوی گیرهێ یا هاڤێتیە بەر كەپا وی و هێشتا نزانیت ب دورستی دێ چەوا ڕیهێن خوە تراشیت؟ و دێ چەوا شویتكا خۆ گرێدەت؟ و دێ چەوا دەرسۆكێن خۆ بادەت و دسەرێ خۆ ئالینیت و كار و كۆكێ خوە كەت؟.
كچ..
كچ چ كچە! یا خودێ تۆ بپاڕێزی فریشتەیە؟! ئەز نزانم، حۆری یەكە ژ حۆرییێن بەحەشتێ؟! ئەز نزانم، یان ژی بویكەكا لاستیكی یا بەردەرێ دوكانێن بازاڕێ شێخولایە؟! دیسان ئەز نزانم. دو چاڤێن لێ، چاڤێ خودێ لێ بیت، گەلەك ژ چاڤێن خەزالان جوانترن، بریێن وێ دێ بێژی ب قەلەمی و ل سەر كاغەزەكا سپی هاتینە كێشان، لێڤێن وێ هەما ئەو چوننە، هندی بەحس لێ بكەی تو نەشێی ئێك ژ هزارێ ژ سالۆخەتێن وان بدەی، بەلێ هەما ئەز دێ بێژم هەروەكی هەردو ب مەقەسێ گۆگڕاندین، ددانێن وێ دێ بێژی دندكێن برنجێ كوردی یێ دەڤەرا ناڤكۆڕێ یان ژی برنجێ بازاری ئەوێ دندكێن وی مینا شیشەینە، ژبلی وێ بەژنا وێ ئەوا وەكی كاتا ڕەشە ڕوحانا ل نیڤا حەودكێن باغچێن باژێڕێ سەمەرقەندێ هەكە بەحس لێ دكەن و بێهنا بسكێن وێ مینا گولێن باغێ ئیرەمێ بۆتانن، مەزناهی بۆ وی خودای بن، ئەوێ ئەو ب وان هەمی سالۆخەتان ئافراندی.
هەردو..
ڕۆژ هاتن و ڕۆژ چوون، ڕۆژەكێ من ژبرادەرەكی زانی كو خودایێ مەزن ئەو كچ و كوڕ هەر دو یێن كرینە ڕزقێ ئێك، ب ڕاستی هند كەیفا من هات كەوەك داچیتە ددەڤێ من دا. ڕۆژەكێ ئەز یێ ب ڕێكەكێ ڤە دچم، ژ نشـــكەكێ ڤــە مـــن دگەلێك دیتن، بەس خوەزی تو ژی وێ گاڤێ یێ ل نك من بای و تە ب دویڤێ چاڤی دیتبان كانێ هەردو چەند! ژ سەرێك دهاتن و چەوا دژێهاتی و بەركەڤتی بوون، باوەربكە وەكی دو گولێن محەمەدی بوون و گەلەك ژ هەژی ئێكبوون و ماشەلا چەوا جوان دگەلێك دپەیڤین! چەوا ب ڕوویەكێ گەش بەرێ خۆ ددان ئێك و دو! و چەوا ب گڕنژین سەرەدەری دگەلێك دكر! ڕاستی مرۆڤ دا خۆت و ڤەخۆت مرۆڤ ژ وی دیمەنی تێر نەدبوو، ب ڕاستی مرۆڤی گونەه دكر و دل نەدهێلا ژ دل تەماشە بكەتێ، لەوڕا من زوی بەرێ خوە ژێ گرت و گۆتێ: هەوە ئێك و دو پیرۆز بیت و خێر ژ ئێك و دو ببینن و چاڤێ خودێ ل هەوە بیت و (هەر ئێك ژ هەوە ژ یێ دی وێڤەترە).
