هنده‌ك ره‌وشه‌نبیرێن مه‌ ئه‌كته‌رێن شانۆگه‌ریا گه‌نده‌لیێ نه‌

هه‌ما كورت و كرمانج ره‌وشنه‌بیر ئه‌وه‌ ئه‌وێ هزره‌كا تیژ هه‌ی ژبوَ ده‌ربازبوون ژ كاودانێن ئابووری و سیاسی و كه‌لتوری و جڤاكی و هزر د یێ به‌رامبه‌ر دا دكه‌ت و جڤاكی دخوینیت و تێدگه‌هیت و د هزرا خوه‌ دا شیكاریێن ب مفا دادرێژیت ژبوَ هندێ كو ژین و ژیارا خه‌لكێ خوه‌ به‌ره‌ف پێش ببه‌ت ژ هه‌موو لایان ڤه‌. و خالا هه‌ره‌ گرنگ دڤێت كه‌سێ ره‌وشنبیر ژ ده‌رڤه‌ی دوور هێلێ جڤاكێ خوه‌ بنێریت و هه‌ر وه‌كو ته‌په‌كا ته‌نسێ بكه‌یه‌ د نیڤه‌كا ده‌ستێ خوه‌ دا و ده‌ستێ خوه‌ ژ خوه‌ دوور بكه‌ی و جوان و ب هشیاری ته‌ماشه‌ بكه‌ی، ئها دڤێت ره‌وشه‌نبیر وه‌سا بنێریته‌ جڤاكی و ب هووری تێدا هزربكه‌ت دا كو بشێت كارتێكرنه‌كا ئه‌رێنی لێ بكه‌ت.
ئه‌رێ بوَچی دبێژم ره‌وشه‌نبیرێن مه‌ ئه‌كته‌رێن شانۆگه‌ریا گه‌نده‌لیێ نه‌ ؟
ژبه‌ركو ره‌وشه‌نبیرێن مه‌ مریدێن به‌رووكێن خوه‌ و پوَست و پلێن كارگێری و به‌رپرسایه‌تیێ نه‌ !
ئه‌گه‌ر تو نڤێسه‌ری یان هه‌لبه‌ستڤانی و خوه‌ ب كه‌سه‌كێ ره‌وشه‌نبیر ددانی و د هه‌مان ده‌م دا تو به‌رپرسی و خودان پله‌و پایه‌ی د ناڤ حوكمه‌ته‌كێ دا كو ب گه‌نده‌لیێ یا تومه‌تباره‌ و ئه‌و حوكمه‌ت ب خوه‌ دانپێدانێ ژ هه‌بوونا گه‌نده‌لیێ دكه‌ت. ئه‌رێ تو چ ره‌وشه‌نبیره‌كی ژ لایه‌كی زكێ خوه‌ ب پارێ حوكومه‌تێ مه‌زن دكه‌ی و ژ لایه‌كێ دی ڤه‌ په‌حنكا ده‌ڤێ خوه‌ نیشا خه‌لكی دده‌ی و به‌حسێ گه‌نده‌لیێ دكه‌ی و ده‌زگه‌هێن راگه‌هاندنێ ژقیره‌ قیرا ڤان تۆڤه‌ كه‌سان چیچركێن گوهێن مه‌ ئێشاندنه‌ و ب چ ئاوایان درازی نین و به‌رده‌وام یێ گازندان دكه‌ن. ئه‌ز ڤه‌كری دبێژم: كه‌كو ب وێ ره‌نگی تو دبییه‌ كه‌سه‌كێ دوو روی چ ب ڤی شێوه‌ی راسته‌ راست بێژین یان ب شێوه‌یێ هوون پێ دئاخڤن!! ئه‌گه‌ر بوَ ته‌ خه‌لك خه‌مه‌ فه‌رموو د ناڤ خه‌لكی دا بژی و كورسیكا خوه‌ به‌رده‌ ژ وێ حوكمه‌تا تو ب گه‌نده‌ل تۆمه‌تبار دكه‌ی ژێ دوور بكه‌ڤه‌. لێ ئه‌گه‌ر كورسیك بوَ ته‌ یا گرنگه‌ لاو بگره‌ و به‌رنه‌ده‌ چ هه‌لبه‌ست و نڤیسینان و بیردوزا ب به‌ژنا كه‌سێن هه‌ژار كه‌ر نه‌كه‌ و د وێ شانۆگه‌ریا حوكمه‌تێ دا رۆلێ خوه‌ ببینه‌ و مه‌ ژ قیره‌ قیرا خوه‌ بێ بار بكه‌ چنكو مه‌زنا گوتییه‌: “كانیا ته‌ ئاڤ ژ ڤه‌خار دارا و به‌را تێوه‌ر نه‌كه‌”.

کۆمێنتا تە