هنده‌ك سترانێن سینگل دێ به‌لاڤ كه‌ت
دهۆك، زنار تۆڤی:
سترانبێژ ئه‌حمه‌د ئۆزده‌میر، كو خه‌لكێ باژێرێ سێرتێ یه ل باكوورێ كوردستانێ و نوكه ل باژێرێ مێرسینێ دژیت، د دیداره‌كێ دا بۆ رۆژناما ئه‌ڤرۆ دیاركر كو ئه‌ڤه پتری 15 سالانه ئه‌و سترانان دبێژیت، مالباتا وی گه‌له‌ك پشته‌ڤانی ل وی كرینه، كو ئه‌و ببیته سترانبێژ، هه‌ر چه‌نده ئه‌و دناڤ مالباته‌كا هونه‌ری دا مه‌زن نه‌بوویه و ب تنێ وی برایه‌كێ مۆزیكژه‌ن هه‌یه ئامیرێ سازێ دژه‌نیت، د نوكه دا ئه‌و دچیته ئاهه‌نگ و هه‌لكه‌فتێن كوردان ل پرانییا باژێرێن كوردان ل باكوورێ كوردستانێ.
ئه‌حمه‌د هێشتا دبێژیت: هه‌تا نوكه وی سترانه‌ك كلیپ كریه ب ناڤێ ( جانێ) كو ژ په‌یڤ و ئاوازێن سترانبێژ جوان حاجۆیی نه، وی چه‌ندین سترانێن سینگل ژی گۆتینه، لێ هه‌تا نوكه چو ئه‌لبۆمێن سترانان به‌لاڤ نه‌كرینه، ئه‌و ڤێ چه‌ندێ ڤه‌دگه‌رینیت بۆ ده‌ست كورتییا بارێ ژیانێ، هه‌ر ده‌مێ بۆ وی ده‌لیڤه چێبیت، ئه‌و دێ ئه‌لبۆما خوه یا ئێكێ به‌لاڤ كه‌ت، هه‌ر چه‌نده ئه‌و گه‌له‌ك حه‌ز دكه‌ت سترانێن سینگل به‌لاڤ كه‌ت، چونكی نوكه خه‌لك پتر حه‌ز ژ سترانێن سینگل دكه‌ن و ئێدی ئه‌لبۆمان وه‌كو به‌ری نوكه رۆلێ خوه نه‌مایه و نوكه چه‌ند سترانێن نوو یێن ل به‌ر ده‌ستێ وی هه‌نه، د ئه‌ڤ ساله دا ئه‌و دێ هنده‌ك سترانێن سینگل و كلیپه‌كێ به‌لاڤ كه‌ت.
