هندهك نۆشدارێن مه گوشت فرۆشن!
سهردهمێ نوكه ئهم تێدا هندهك دبێژنێ سهردهمێ زێرینه، لێ ئهگهر ب دروستى ئهم بزانین بۆ كێ زێرینه؟ چهوا زێرینه؟ دیار و ئاشكرایه كو بۆ وان دهم و سهردهمێ زێرینه ئهوێن دشێن ب دارێ زۆرداریێَ دشێن نانێ خوه پهیدا بكهن، بۆ وان كهسان گرنگ نینه ئهوێن نان یێ چاڤ شۆریێ بیت یان ژى نانهكێ سهربلندیێ بیت، ژیانا ب وى رهنگى یه ههر كهسهك تووشى هندهك نهخۆشێن جهستهى دبیت و مرۆڤ بۆ چارهسهریا خوه قهستا نۆشدارهكى دكهت داكو بشێت رێیا چارهسهریا نۆشدارى ساخلهمیا وى باشتر بیت، هندهك نۆشدار گوشت فرۆشن، گوشت فرۆش: رۆن و ئاشكرایه ههر كهسهك خودان بیر و بۆچوونكه و ههر كهسهك دێ ب ڤێ پهیڤا گوشت فرۆشى تێگههشتنهكێ ل دۆر خوه پهیدا كهت، لێ ئاماژا من ب گوشت فرۆشیێ ئهو چهندهیه د ڤى سهردهمى دا و د ڤان كاودانێن دژوارێ مللهتێ مه تێدا دهرباز دبیت، گهلهك فهره ههر لایهنهك ههر تاكه كهسهك ب رێیا ههر جۆره كارهكێ خوه یێ هاریكار و پشتهڤان بیت ژ پێخهمهت وێ چهندێ د ڤان دژواره كاودانان دا بارێ وهلاتى سڤك ببیت، نۆشدار دڤێت نۆشدار بیت ئهگهر قهیران و كاودان چهند دژوار بن، مامۆستا دڤێت ل چهپهرێن وانه گۆتنێ یێ ئاماده بیت ئهگهر نیڤ مووچه ههر ل بهندا وى بیت، هزاران فهرمانبهرێن دى ب ڤى رهنگى دڤێت خۆراگر بن، بهس ب نهخۆش بهخانهیه خالا ئهز حهز دكهم ل سهر ب راوهستم دێ بهحسێ نۆشداران كهم، لێ بهحسێ وان نۆشداران دكهم ئهوێن دهمێ كلینیكا وى تژى دبیت ژ نهخۆشان شوینا ئهو ئالۆز و نهخۆش بیت كو وهلاتى دنهخۆشن ئهو نۆشدار ژ كهیفان دا سوجدێ بۆ خودێ دبهن چونكه رۆژ رۆژا وانایه بۆ ڤالاكرنا بهریكێن خهلكى، هندهك نۆشدار وههانه دهمێ نهخۆشهك قهستا وى دكهت شوینا پێكولێ بكهت ب ئاخفتنێن خوه یێن جوان نهخۆشیا وى كێم بكهت دێ هزر كهت دیاركرنا نهخۆشیا وى راستیه لێ بهرۆڤاژى وێ چهندێ چونكه دێ بارێ وى نه ئاسایى مینیت، تشتهكێ دی ژى حهز دكهم ئاماژه پێ بدهم، هندهك نۆشدارێن مه دلۆڤانى د دهروونێ وان دا هشك بوویه چونكه د ڤى كاودانێ نهخۆش دا گهلهك نهخۆش قهستا وان دكهن فهره ئهو هزر د هندێ دا بكهن هاریكار بن بۆ خهلكێ خودان قهیران لێ چ قهیران و نهخۆشى ل نك وان دیار ناكهت چونكه ههمو ئێڤاریهكێ ئهو پارزینكێ خوه تژى دكهن و ب كهیف و خۆشى ڤه قهستا مالێن خوه دكهن، گهنجهكێ ڤى وهلاتى بهحسێ خوه و نهخۆشیا خوه دكهت و دبێژیت: بۆ چارهسهریا خوه من قهستا وهلاتێ ئوردنێ كر، دهمێ گههشتیمه وى باژێركێ كو نۆشدارێ من لێ، ژبهر كو من كلینیك نهدزانى و دهربهدهر بووم ئاوارهى وهلاتهكى بووم، من نهدزانى دێ چ كهم! زێدهبارى وێ چهندێ ئهز خولیسهرێ هندێ مه كو ژبلى زمانێ كوردى من زمانێ عهرهبى ژى نهدزانى ب تنێ چهند پهیڤهكێن كێم نهبن! تنێ تاكه چارهسهرى بهر دهستێ من بوو ئهو ژى: كارتهكا وى نۆشدارى بهردهستێ من بوو ئهو نۆشدارێ قهستا وى دكهم بۆ چارهسهریا خوه، من تهلهفۆنا خوه ژ بهریكا خوه ئینا دهر و پهیوهندى ب نۆشدارى كر، تهلهفۆنا نۆشدارى چوو و بهرسڤ دا و گۆت: بهلێ كهرهمكه من گۆتێ نۆشدار ئهز فلان كهسم ژ فلان جهى هاتیمه بهس نه شارهزامه و جهێ ته نزانم نزانم كلینیكا ته ل كیڤهیه، نۆشدارى كره كهنى گۆت: تو ل كیڤهى تنێ جههكێ بهرنیاس ناڤێ پێشانگهههكێ تشتهكێ بۆ من بێژه كو نێزیكى ته بیت من گۆت بوچى؟ گۆت تو بێژه ته خهم نهبیت، من ژى ناڤ و نیشان بۆ گۆتن و چ پێڤه نهچوو من دیت كهسهك ژ ترۆمبێلێ هاته خار و هات گۆت وهره ئهز نۆشدارم دا بچینه كلینیكێ! ئانكو نۆشدار هاته وى جهێ ناڤ و نیشان لێ داكو كهسێ غهریب نێزیكى خوه بكهت، ئهرێ ل نك مه ژى ب ڤى رهنگى یه؟ نۆشدارێن مه دهێن خوه ل مه دكهنه خودان؟ یان ژى بهرسڤا تهلهفۆنێن خوه ددهن؟ یان ژى تلهفۆنا سكرتێرێ نۆشدارى ب (15) رۆژان ژى یا گرتى بیت و ئهم نهشێن بۆ خوه ژڤانهكى وهربگرین، لهورا بلا ئێدى بهس بیت بلا كار بكهین ژبۆ هندێ پێكڤه ژیانا مه ئارام ببیت و نۆشدارێن مه بلا ئێدى بهس بن خوه ل خهلكى بكهنه خودان زێدهبارى هندێ ژى كو خودانێ مه ههر تاكهكهسهكى خودێ یه، لێ دڤێت د ڤان جۆره كاودانان دا دهستێ وان یێ درێژ بیت بۆ ههر نهخۆشهكى پشتهڤان بن تاكو ئاخفتنێن وان ب وهها بن ببنه چارهسهرى بۆ نهخۆشێن وى، داكو شوینا ئهم قهستا وهلاتێن بیانى بكهین بۆ چارهسهریێ، بلا ئهو رۆژه بهێت ئهوا خهلكێ بیانى قهستا مه و وهلاتێ مه دكهن بۆ چارهسهریێن خوه.
